Sukie 蛻變赤裸畀人睇

歌手石詠莉（Sukie）自從脫離組合Freeze後，沒有再推出新碟，相隔多年，她以個人名義推出全新EP《蛻變》，當然樣樣都睇到實，緊張過生仔！她「蛻變」的成果，從其新碟封面可以見到端倪：「以前啲人可能覺得我係一個好性感嘅女仔，依家我想畀真實、赤裸裸嘅一面大家睇！所以封面都淡妝上陣，冇花巧，想大家見到我簡樸嘅一面！」她以真空Deep V上陣，講到明絕無加墊，百分百真材實料，她說：「唔想好似啲模咁唔自然！我以前有E Cup，最近瘦咗都仲有B或C Cup！」

與C君心意相通
她希望歌曲可以為歌迷帶來新鮮感，除了翻唱許美靜的《傾城》，亦找來C君為其新曲《一個人的旅行》填詞，她說：「首歌寫出咗我由以前到依家嘅睇法，我同C君講咗想寫啲咩，佢就完全表達到我嘅諗法，好滿意！」而她亦正積極練泰拳，為即將開拍的動作片做足準備！