女馬主梁芷珊名下前馬王、方嘉柏馬房的「軍事出擊」，上季失落馬會盃，幕後團隊用咗一年時間，就成功收復上屆賽事之失，兼且向「將男」台前幕後報番一箭之仇。
這天第六場上演今季首項國際賽前哨戰，2000米國際二級賽馬會盃，結果「軍事出擊」同潘頓呢對最佳拍檔，吸收上屆同賽過早出頭，而臨尾畀「將男」後上冚過做二奶的教訓，今場以其人之道還治其人之身，人馬等到「將男」率先突圍後，好整以暇地發揮強勁衝刺，從「將男」內側竄上一攻而破。結果「軍事出擊」以原莊配搭勝出今屆馬會盃，自動入選下月13日同程2000米國際一級賽香港盃，兼且一連三季於馬會盃交出冠亞季各一。快轉8歲之「軍事出擊」可謂寶刀未老，歴來10捷8奪級際賽，累積獎金近5,700萬。
「軍事出擊」今場單Win派37元，組合獨贏開A1派17元。「將男」功虧一簣只跑第二，此駒與郭能衛冕馬會盃失敗，第三名由2000米未上過名的「美麗大師」夥拍巫斯義取得，人馬首度合作有交代。第四名係復配雷神的「喜蓮歡星」，人馬合作三戰兩位未開齋，四重彩派933元係這天暫時最低紀錄。
三T有人中正獎，每注派超過63萬元，安慰獎派一萬二千幾。 |
發表於 2015-11-21 08:26 PM
| 