呢個世界好現實，任何體育盛事同埋賽馬，大家只記住邊個係冠軍，亞軍冇人理，Gibson高伯新上季得27場頭馬，外界已經覺得佢跌watt，今季未見起色，暫時更只得6Win排喺練馬師榜下游，亞軍卻多達16次，只怪運氣唔好。
記得上次沙田賽事期間，有位馬主問Gibson會唔會趁聖誕離港幾日，散一散心兼行個大運，估唔到佢霸氣回答：「練馬係我嘅工作，聖誕節唔等於啲馬可以放假，馬匹要接受訓練，我就會留喺度盡自己責任，唔會隨便行開。」
不過其他外籍廐主如大摩、苗禮德、霍利時、胡森、孫達志等就唔信呢套，全部聖誕離港。到排位表一出，高廐8匹參賽馬中，6匹都抽到不利檔位，包括3匹機會馬「甜城效應」9檔、「得利多」14檔、「妙感」10檔，排位後問過Gibson，佢繼續神級回答：「我起用得嘅騎師，全部實力有番咁上下，佢哋自己會有辦法應付。」
其中第八場三歲馬1400米新馬錦標匹「妙感」，上場初跑谷草1200米抽到12檔，最後幾步勢頭非常兇狠，只輸畀「鑽石巨匠」馬頸位，直路好肯追馬，反映出佢鬥心好強。據知幕後早喺上場未跑前，就已鎖定今場盃賽為目標，對增程角逐1400米有一定把握，既然上仗12檔都差啲贏，難怪今次10檔Gibson根本唔在乎，亦冇擔心過！ |
發表於 2015-12-27 01:02 AM
| 