第八場1400米新馬錦標係這天沙田馬場重頭戲，亦係今年最後一項盃賽，專供三歲馬參加，結果畀雷神同大摩夾手夾腳捧走，兩人合作馬、田北俊愛駒「人民武士」上仗國際賽日季內初出由貝湯美跑1400米，不敵「再開心」得第二，但就收熱身之效，今場一由雷神接手，即以霸王式後勁一衝過晒，2.6倍大熱贏馬敲響季內勝鼓，兼捧走埋新馬錦標，跨季近四戰三冠一亞全入Q，100萬澳紙身價，果然貨真價實，不過被封政壇新抽水王的田北俊，在美國戴頭盔諷剌吳克儉後，似仍未返港，這天不見蹤影，由親朋戚友拉頭馬兼代領獎盃，不過田北俊今場卻可佔約80萬元獎金。
雷神這天已經憑「喜威威」、「連利進寶」、「開心遊戲」、「人民武士」四喜臨門，個人一連四次賽事狂數16Win，做咗賭馬人民的英雄！
與此同時，大摩亦憑「人民武士」打破近期錦標荒，賽後他更宣佈再婚，與紅顏知己Fifi姐結成一對。今場閘前只得兩駒着綠燈落飛，結果一對主角「妙感」同「一片光明」影相分獲二、三名，前駒出道三戰三亞未開齋，後駒則連續四場出擊跑位置，今次得第三，脫離新馬賽後仲未贏過，第四名則係新勝1400米的「錶之勝」，四重彩2,863元。
另一新勝馬「經典帝國」縮番落1400米，唔放而留，拉士衝落唔多只跑第五，13屆冠軍韋達已經連續十次賽事交白卷。 |
發表於 2015-12-28 12:04 AM
| 