曾經為本報及有線電視擔任馬評工作多年嘅珊翠絲，亦係保險界猛人，佢仲有個特殊身份，就係本港首位女馬評家，躋身馬主行列。
點解有興趣養馬呢？珊翠絲說：「有一班朋友，平時都成日出嚟飲飲食食，如果大家養到一隻馬，開心囉。我搵咗一啲朋友組成個團體，嘗試抽馬，我哋有九份人嘅。」
珊翠絲隻愛駒「心好事成」最初冇乜表現，但有次大冷門跑到季軍，已帶挈佢哋贏錢。「大家都買啲（投注）例飛，有啲朋友都覺得死梗，你隻馬唔得，但都支持，結果買100蚊都中4000幾蚊。」
「心好事成」之後越跑越好，兩次喺濕軟嘅場地上取勝，成為高班馬一份子，嚟緊禮拜三佢又再上陣，天文台預測周三有雨，老老實實今次贏唔贏得先？「佢淋地又好啦，因為會削弱到對手，我哋都想落雨嘅！」
珊翠絲仲大爆連冠軍級騎師莫雅都睇中「心好事成」，令華將梁家俊冇得騎呢隻馬。「本來好似想搵梁家俊騎嘅，孭輕磅，但根據沈集成（練馬師）講，唔知真唔真啦，佢話莫雅打電話嚟話想騎，咁沈集成就畀咗莫雅騎！」 |
發表於 2016-1-19 09:37 PM
| 