神琦女將蔣嘉琦，延續神奇之旅，上周六至憑「旅遊首席」及「海嵐一號」起孖兼捧盃揚威沙田，四日後的這晚轉戰谷草，佢又有馬贏。
蔣嘉琦於第五場三班1000米，夥拍李易達馬房「海之濤」由頭放到尾贏頸位，爆出10倍冷Win，完成今季三捷，組合獨贏A2派24.5元。嘉琦強勢取得個人九個賽日連勝，首季在港出賽頭馬增至26場，比13屆冠軍韋達只少三場，李易達亦繼上周三「享耆成」後，連續第二次谷草夜賽爆冷贏馬，今次同時係呢對騎練首度合作建功。
7歲之「海之濤」堪稱奇馬，服役生涯累積八捷，清一色谷草最短途1000米，表現同蔣嘉琦一樣咁神奇。
蘇保羅馬房這晚比較失運，第三場「威利熱流」出擊做二奶，今場大熱門「香江穩勝」命運一樣，轉廐後一連兩仗用柏寶搏殺都係第二，始終贏唔到在港首場頭馬，三、四名則由「忠心義氣」及「越感」瓜分，四重彩派三萬七千幾。
李易達表示「海之濤」今仗取勝原因有兩個，一是此馬一貼欄跑威力特別強，巧合地一、二檔兩駒均沒有埋欄，令六檔之「海之濤」收漁人之利，二是今仗中段時間比上場慢，此駒可以回氣，而上場落第正因為中段時間太快，未能回氣。 |
發表於 2016-5-19 12:05 AM
| 
