09 Estima 3.5 Aeras胸襟廣闊晒線條

夏日炎炎，最爽梗係去海灘啦，不過排隊逼換衫好煩啫。都係兩位 ATV靚女藝員陳莎同筱靖夠醒，揸住部內櫳超大嘅全新頂級特別版 3.5 Estima貢去赤柱，閂埋門遮埋窗，就將部車變身私家更衣室，服未！

醒用超巨內櫳

豐田 Estima不嬲都有追捧者，新 2.4公升入門版年初率先抵港， 3.5公升頂級版終於登場，呢部更係 LeatherPackage特別版，三排真皮座椅，齋睇高級坐落舒服。抬頭睇睇嗰兩個大天窗，完全唔會浪費夏日陽光，唔怪得兩位靚女話攤喺度嘆住冷氣曬太陽至正！三排七座位空間十足，中排大班椅附有伸縮腳墊，後排更可電動收摺於地台下，水泡、浮床統統質得落。陳莎同筱靖同係選美出身，有樣有身材，講到去公眾地方換衫玩水曬太陽就點都有少少顧忌。佢哋就大讚Estima除咗容量大，放平中、後排變出嘅巨型空間仲有醒目用途：變更衣室！加埋雙趟門上落方便，實在係夏日享受日光浴嘅至佳交通工具！

■雙天窗開揚之餘，更提供另類曬太陽法。

■中排變化靈活，惟椅背不可完全平置。

「霸王」玩線條美

■ V6 Dual VVT-i引擎亦標榜慳油。

近年 Estima呢類MPV車型大熱，運載能力強係一大強項，「呢類車最啱同屋企人、朋友齊齊出街去玩，載人載物都多。」估唔到整日拿水槍向人射水、最百厭嘅陳莎咁顧家。另一賣點當然係坐得舒服又唔難操控啦。「七、八人車最好就係搵司機楂！」雖然筱靖咁講，不過計我話，搵司機揸車唔係唔好，之但係全新 Estima採用3.5公升 VVT-i引擎，搭配六前速加減波，最大馬力輸出 280匹，加上配備多項安全系統，性能強操控性高，自己揸都一樣咁好玩！睇埋外觀，09 Estima屬小改款， 3.5版本跟年初引入嘅2.4版本並無分別，整體而言，跟上一代相比，線條顯得較為幼細流麗，外號「大霸王」嘅佢，睇嚟想轉走斯文路線呢。