Tiida Green Sporthatch滑出超巨空間

環保似乎慢慢融入生活，掉垃圾好自然會將玻璃、鋁罐、膠樽分開放，舊報紙雜誌又會放落大紙箱再回收，大家喺不知不覺間都展開咗綠色生活，開車出外又可以揀Tiida Green Sporthatch環保車，低耗油少廢氣、得到日本國家汽車安全最高標準及美國公路安全保險機構最佳評級。呢部環保包裝嘅新Sporthatch，仲再加一個賣點：後排曉「滑」，滑一下，空間感大增！

■後排變靈活，放低椅背， 2,035mm內櫳一氣呵成。

靜靜起革命
早兩年 Tiida轉新款，只屬小改款車型，第一個印象係：嘩！固有印象 1.5公升屬小車一族， Tiida體形一啲都唔係小車，Sedan款更偏向中型房車格局，最誇張係內櫳闊落得緊要，而舊版嘅Sporthatch款式後排係固定座椅，只能摺合以提升尾廂容積，不過就算座椅固定不動，亦無損大尾廂嘅印象。今日，全新 2009Tiida推出全線Green系列，反傳統玩潮流，一樣令我嘩嘩聲，點解？第一觀感係：個樣有咩分別？或者唔少人都有同感，我覺得呢點反而係新車玩味之處，看似一樣反而更考功夫，點樣將佢變成慳油安全潮車仔？

■ Cabron皮革同纖維座椅，金配黑，環保唔一定老土。

■中控設計唔算潮爆，突見音響邊泛藍光，驚喜，亦係生活趣味。

後排變靈活
一如房車系列， Sporthatch亦齊齊換上導入全新環保技術嘅引擎，好似加入 N-Logic系統，每當踩停部車時，系統會自動將波段調至N波，大大減低引擎負荷嘅同時，亦減少燃油噴射，大大降低耗油量。新車唔係混能車，未至於曉用電力推動行車，但新技術亦能喺車速減慢時自動以車輛嘅動力推動發電機，反過來為車輛提供電力，又同時為電池補充電量，即係話唔使部機長期係咁Run，慳唔少油之餘，廢氣排量更大大減少。另一個加分嘅改變係，後排由固定不能動嘅座椅換上前後滑動式，更可以調校椅背角度，超闊內櫳加頭、膝、腳寬敞空間感依然。將座椅向前滑動，再收起後排放平，置物位更大得誇張，無天窗都十足開揚，爽！