暗藏豹紋　甲蟲有獸性

甲蟲唔係只識賣可愛，改裝玩味一樣有睇頭。原廠就示範將架 Beetle Cabriolet，換上豹紋座椅。甫開篷，一股濃烈狂野彈射而出，左手不期然拍落+/-波，右腳充滿戰意地踩油門， 115匹 2,000cc細蟲仔，獸性大發時原來都幾 Powerful。

溫馴狂野出奇夾

■閂篷時甲蟲依舊圓潤可愛，外表睇唔出有乜鬼馬位。

近年熱改 MINI，由 Racing辣件到天鵝水晶，個個玩到不亦樂乎。一樣賣可愛嘅 Beetle闊佬懶理， Fans就係 Buy嗰種經典親切感，若然要玩嘢，其實都可以好出位。近日廠方就以開篷甲蟲做示範，將內櫳座椅配上豹紋絨面，可愛 Look加狂野 Feel，襯落又出奇地有火花。開篷後嗰種溫馴搭狂野嘅衝擊，真係媲美 Baby着豹紋泳衣遊街。任何甲蟲都可裝配呢款豹紋絨布，原廠連工包料$9,800，聽落好似揦脷咗啲，但其實佢並非全張凳包上豹紋咁簡單，而係梅花間竹襯番內櫳真皮位，人工成本都唔少， Two Tone Color，一皮嘢有找點算係貴。

■將手柄一拉一扭後，就可以電動式開篷，需時約 22秒。

■關篷時需手動式鎖頂，懂得竅門唔使好大力都鎖到。

■原廠設計圖展示嘅野性 Look夠全面，可惜香港只可選座椅變豹紋。

■ 2.0L推動細車，再加 6速+/-波箱，蟲蟲一樣爆得起。

車仔都有火

■新甲蟲加入不少電子科技，但仍保持過往經典味道。

MINI同 Fiat 500揸得多，甲蟲反而少機會接觸，見係開篷車當然唔會放過，影完相順勢開篷遊埋車河先收工。雖然 Beetle無 Turbo，不過咁細架車有成 2,000cc，其實已經好夠爆，係初段嫌波箱反應慢啲，唔夠刺激，不過一轉落+/-波模式，表現即時兩個樣，燈位起步爽快有勁， 6波段行高速時更爽更順。雖然天氣陰凉，開住篷疾飆的確幾凍，不過頭腦更清醒，加上甲蟲靈活矯捷，令戰意更高漲，只係難為咗同車嘅豹妹 Isis啫。