Stepwgn 改良版 Family Man貴氣暴走

做得 Family Man，照顧家人總係第一位，不過都唔可以無咗自己個性，尤其家周街「型爸」嘅年代，作為老竇嘅你，又點可以揸架老土車出出入入！所以，家庭味十足嘅 Honda Stepwgn 都嚟個型仔改良版 Spada，電鍍配飾、包圍、尾翼齊齊上身，實行用暴走 Look馴服呢班住家男。

擾流泵把一體化

■內櫳 Keep住 Stepwgn開揚過人嘅優點，但就提升咗貴氣。

啱啱轉款嘅 Stepwgn喺今年年初亮相後，車型更趨年輕化，相信唔止六十後，七八十後嘅車主，一樣俾佢吸引，尤其係佢擁有同級中最巨型天幕，差不多佔據整個車頂，令唔少人為佢傾倒。不過見好就收呢句說話喺家呢個年代梗係唔多合時，乘勝追擊先至係做生意之道。所以話咁快，代理就再引入改良版 Stepwgn Spada。講明係改良版，要求梗係高啲，前後包圍及裙腳等配套梗要有，全車擾流組件全部原廠出品，而且部份擾流組件同車身相連。以車頭為例，擾流器與頭泵把連成一體，無咗接駁位，令整體線條更為流暢，加上微微上翹的設計，令頭唇更型。要搶眼，型格鬼面罩當然唔少得，老實講， Stepwgn的電鍍鬼面罩本已夠閃夠奪目，今次 Stepwgn Spada更加喺車前增加一大幅電鍍飾面，反光程度，簡直可以當鏡照。霧燈位置底部亦增加了蜂巢網，霧燈兩邊亦有 U形線條包圍，格外醒神，加上中間大大塊網狀氣壩，整個車頭更添惡相。

1.車尾定風翼減低車頂硬朗感。

2.車頭包圍與泵包相連，更具流線感。

3.車尾包圍都經過重新打造。

內櫳谷豪華感

■容易操控加上慳油，是 Stepwgn一大賣點。

至於車櫳，雖然並非 Stepwgn Spada嘅改良重點，但亦絕對花過心思。中控台橫跨至前座乘客位的黑色鋼琴面飾、四個門邊鋁合金腳踏，為車櫳增加貴氣。既然要營造一輛有玩味嘅 MPV，操控感亦必然要提升，以往 Stepwgn無嘅+/-波功能，就可以喺 Stepwgn Spada搵到，不過軚環撥片設計就偏向小巧，大男人使用時，可能稍為不便。雖然胎軨尺碼仍然係 Stepwgn嘅 16吋，但就換上另一套合金軨，配合全車「型」格。歸根究柢，講到車，性能一定係大前提， Stepwgn Spada性能同 Stepwgn一樣， 2.0公升 i-VTEC引擎及 CVT無段變速自動波箱，最大馬力 150匹，扭力輸出 19.7kgm，慳油功能係一大賣點，啟動「 Econ Mode」，波箱、空調甚至引擎都進入省油模式，維持最低耗油表現。

■車櫳鋼琴面裝飾，貴氣大大提升。

■增+/-撥片，操控性更強。

■增加包圍尾翼後，車身更形貼地。

規格
引擎： 1,997cc 4汽缸 i-VTEC
馬力： 150ps/6,200rpm
扭力： 19.7kn-m/4,200rpm
傳動：七速+/-自動波
售價：待定

即日睇新車
即時就想親身睇睇型晒嘅 Honda Stepwgn Spada？得！新都城車展今日新車現身，車展期間購買本田車有優惠：包括以$2,000升級 Jazz Trio Passion Package、免首年牌費及首年汽車全保，免費升級皮座、升級 DVD影音組合及現金折扣等。

地點：將軍澳新都城日期： 4月 24-25日（ 10:30am-9:00pm）

收藏分享評分

回復引用

訂閱 TOP

返回列表