19/11/2010
利物浦贊助商渣打銀行為推廣亞洲市場，本月十六日廣邀香港、中國、新加坡、韓國等地記者遠赴晏菲路球場「朝聖」，主席莊貝思（John Peace）、公共事務總管羅斯（Gavin Laws）等巨頭，於倫敦總行設下盛宴款待，詳述這次「十億贊助」始末。莊貝思表示，英超球迷遍布全球，而利物浦於亞洲、非洲勁多粉絲，同渣打目標市場不謀而合，今次贊助可謂「EASY DECISION」。但Gavin就坦言擔心謝拉特、費蘭度托利斯季尾鬆人，如果今季未能殺入前五的話，將會好大鑊！
利物浦亞非fans夠多
拿仁身為紅軍「死硬fans」，今次夢想成真，簡直發夢都識得笑，就算十三個鐘頭機全程冇瞓過，去到倫敦仍鬼打咁精神。連同香港另外五個行家，加埋亞洲各地約三十個記者齊齊殺到渣打總部，主席莊貝思親身解畫，透露四年共贊助紅軍八千萬鎊因由。佢表示足球令人血脈沸騰，係全球其中一項最受歡迎運動，而紅軍有輝煌歷史，不僅於亞洲如新加坡、馬來西亞等地擁有勁多球迷，原來於非洲fans亦多得驚人，呢點同銀行目標市場非常近似。而Gavin亦認為，紅軍於中國、香港嘅受歡迎程度不下曼聯，再加上個底夠乾淨、形象又正氣，所以當佢向主席動議要贊助紅軍，後者認為係「容易不過嘅決定」。
渣打主席貼3:0波膽
記者會結束後，拿仁與眾記者同Gavin食飯，佢話同紅軍傾合作可謂一拍即合，但佢亦擔心球會目前表現麻麻，如未能殺入英超前五，對銀行回報必有影響；若「紅軍孖寶」季尾走埋，渣打就更加冇眼睇。目前Gavin同利物浦坐埋一條船，當然做埋die hard球迷，佢仲向在場記者「畀波膽」，話周六紅軍主場可贏韋斯咸三比○，話到明會開「和主」，各位賭仔如信「幕後料」，不妨跟番多少！ | 
發表於 2010-11-19 05:06 PM
| 