[新聞] 英超賤男齊成功箍煲 大團圓

lewistai

一路都以為英超兩大賤男傑斯同艾殊利高爾（ A高）都唔會有好下場，點知峯迴路轉，呢對賤男竟然齊齊箍煲成功，大團圓結局，整齣英超版《團圓》畀大家睇。
現年 37歲、效力曼聯嘅傑斯，自從喺早前被踢爆背妻搞前威爾斯小姐托瑪絲，同埋細佬洛尼老婆娜塔莎之後，形象即時插水，由英超好男人變英超賤男。而佢喺上月 28號打完場歐聯決賽之後，嗱嗱臨同老婆斯泰茜同埋啲細路，去咗西班牙馬略卡度假兼箍煲。英國《世界新聞報》噚日圖文並茂報道，斯泰茜因為衰心軟，願意既往不究；而呢啲相都係傑斯爆出婚外情醜聞後，兩老婆首次一齊曝光，從斯泰茜嘅表情嚟睇，佢真係原諒咗佢個賤男老公。知情人士話：「斯泰茜冇咗傑斯就唔可以生活落去。佢原諒咗傑斯，不過就好認真咁同傑斯講：『今次係你嘅最後機會。』」

傑斯夫婦馬略卡晒幸福
據了解，傑斯同斯泰茜喺馬略卡度假期間深情對話，而且傾咗幾個禮拜。斯泰茜身邊一個朋友咁講：「斯泰茜經過多番內心掙扎，最後決定原諒傑斯。佢仍信任呢段婚姻，並認為可以同傑斯繼續一齊生活落去。當然，佢唔係隨隨便便就原諒傑斯，傑斯要證明自己一定唔會再去偷食，而傑斯亦清楚知道係最後機會。」另一個友人則話：「斯泰茜的確係原諒咗傑斯。如果佢唔想再同傑斯一齊，就唔會去度假啦！」

雪露想同 A高生仔㖭
除咗傑斯，英超另一賤男、效力車路士嘅 30歲英格蘭左閘 A高亦箍煲成功，喺上個禮拜氹掂自己個靚靚歌星老婆雪露，再喺番埋一齊。雪露身邊啲朋友話：「雪露認為當初唔應該同 A高離婚。今個月尾佢就 27歲，佢唔想等自己過咗 30歲，再去組織過一個新家庭，佢想生小朋友；而佢亦相信， A高係最理想嘅爹哋人選。」做錯嘢嘅人，唔係個個都有機會改過。係人都知 A高係「派對動物」，最鍾意去夜店獵艷，家陣佢同雪露復合，希望佢同埋衰到連自己細佬老婆到唔放過嘅傑斯，都會好自為知，咪再因為搞三搞四而再做頭條新聞人物。