復活節英超早場戲碼吸引，熱刺主場對樸茨茅夫實為一場「矛盾之戰」，熱刺屬全攻型，進攻火力僅次於曼聯，樸茅則守強於攻，阿古睇好踢法主動兼有主場之利熱刺，主W1.75倍捧得過。（now 898周六晚8時45分直播）
唔計盃賽，熱刺英超攻入五十八球，入球數字同阿仙奴睇齊，僅比曼聯少三球，周中快車同車路士踢成四比四更係一絕，貝碧托夫同羅比堅尼晒火，連活基治同侯度史東呢類防守球員都有「士哥」，可見熱刺新領隊桑迪拉莫斯執掌下攻門瓣數仲多過以前，今晚繼續主場出擊值得睇好。
樸茅冇迪科爾蝕章
樸茅係防守型球隊，後防守力有餘，攻力一般，中場柏巴迪奧普、狄亞拉等截擊力強創造力不足，一月由熱刺轉投樸茅迪科爾因合約問題不能倒戈，進攻中場蒙達利停賽，令該隊踢法更被動。
熱刺捧走英聯盃歐洲賽入場券，可惜歐協盃出局，餘下時間就可以揀波踢，目標係取悅球迷，主場出擊當然要全力求勝，反觀樸茅目前最重要梗係英足總，佢入四強，其餘三隊都係低組別球隊，咁都捧唔到盃話，下次都唔知等到幾時，所以聯賽有保留係人之常情，今晚作客白鹿徑球場踢死守戰術，估計輸一至兩粒係正路賽果。 |
發表於 2008-3-22 11:42 AM
| 
