不愁收入了！冠軍級廐主 宣佈收留湯智傑

02754566

33歲的本地騎師湯智傑苦戰大半季，今季只贏過「運財之星」一Win，由於長期支持不足，騎者早前已宣佈今季後將掛靴。
湯智傑有兩名年幼子女，是家庭經濟支柱，但他唔再做騎師，卻不愁出路，練馬師告東尼透露，他將入紙馬會，申請湯智傑擔任東廐高級騎馬人。
高級騎馬人的人工比普通策騎員高，實際收入有幾多則因人而異，主要是按資歷來計，而高級騎馬人有得分馬房獎金，東廐是大倉，時贏大賽，相信湯仔未來收入應不俗。不過大家勿以為今季湯仔做騎師好霉，其實連策騎費及獎金，馬季期間平均每月有5萬蚊。
告仔話只要湯仔夠勤力，就會給對方機會，可闖出一片新天地。近年不少年輕華人騎師，轉任幕後很快升為副練，如苗廐副練余詠詩、胡廐副練薛順強、摩廐副練王志偉等。
湯智傑當然希望掛靴前贏番場馬，本周三(18日)第七場四班1650米，佢騎方廄「贏到爆」，隻馬最近評分已大幅下調，今次回師快活谷一哩是強項，季初曾於三班入Ｑ。今回明顯加強操練，有課三駒拍跳主動帶放佔先，表現相當好，睇部署方嘉柏有心關照湯仔出冷。