[新聞] 曼聯天才鍾斯　呈獻絕技「倒掛手球」！

只要你係諧星，通常一世都係諧星，曼聯中堅鍾斯就係人辦。呢名英格蘭後衞由加盟時嘅三獅天才，之後一路發展平平，令人最有印象嘅都係佢個「冏樣」，其他都冇咩代表作。但今場季前熱身賽對基斯迪辛德，鍾斯隆重呈獻「倒戈手球」：倒掛抽射唔係中龍，而係中自己隻手。

鍾斯去到挪威難得正選上陣，為咗搶來季曼聯正選位置，鍾斯踢得好肉緊，見對手冇咩攻勢就頻頻上前助攻，其中一球佢難得於對手禁區內空晒，個波九樓咁高跌落嚟，鍾斯諗都唔諗跌起倒掛，但個時間就錯晒食唔正個波，個波冇飛去龍門，而係射中自己隻手。

唔少網民睇到呢幕都好開心，話呢個世界，只係得鍾斯可以超越自己，之後除咗冏樣，鍾斯可以話畀人聽識呢個絕技，咁樣倒掛唔係個個得！