問題12碼贏熱刺 老費嗌過癮
曼聯阿仙奴歐聯前齊捷
27/04/2009
曼聯昨晨上演絕地反擊，下半場一口氣連省五粒反勝熱刺，冕之路又行近一步！呢場波充滿爭議性，若非球證韋伯錯判十二碼「放生」紅魔，呢幕逆轉好戲做唔做得成都係未知數。至於紅魔鬼歐聯四強對手阿仙奴，尋晚亦順利做低米杜士堡，雙方齊齊歐聯前夕敲響勝鼓！
熱刺先憑戴倫賓特同莫迪歷各建一功，半場領先曼聯兩粒，之不過易邊後就因為球證韋伯一個錯誤判決令形勢逆轉。當時靴里奴高美斯出迎撲跌卡域克，英國BBC同ESPN網站都指高美斯係拍到波(但TOK指高美斯拍唔到波），但韋伯竟直指十二碼點，帶挈C朗建功破蛋。
兵工廠兩蛋贈米堡
呢個入球打起晒紅魔球員士氣，之後朗尼梅開二度，C朗入多粒加上貝碧托夫埋齋，最後曼聯以五比二反勝熱刺，繼續高踞榜首兼領先多踢一場利物浦三分。
賽後費Sir就牙擦講風涼說話：「因為球證冇畀十二碼，我冇隻足總盃，今戰就因為一個問題十二碼為球隊帶三分，足球就係咁過癮！」查實八年前熱刺就試過領先三球，下半場畀曼聯一口氣連入五粒輸波，認真宿命難違。
至於尋晚兵工廠就憑法比加斯梅開二度，以二比○擊敗米堡，暫以六十五分穩守「四哥」位置，米堡就繼續排尾三，護級壓力百上加斤。值得一提係，領隊雲格下半場七十分鐘就收起法比仔同禾確特，擺明要為周中撼曼聯留力。 真係口同鼻拗 | 
發表於 2009-4-27 07:08 AM
| 
發表於 2009-4-27 08:35 AM
| 
