標題:
日本實試跑化Wish 2.0爸爸也飆彎
[打印本頁]
作者:
nt1972
時間:
2010-6-18 06:46 AM
標題:
日本實試跑化Wish 2.0爸爸也飆彎
皇冠拉大隊邀傳媒到東京試車，故作神秘唔肯透露係咩新車，但就事先張揚其中一日會落 Track。凌志 LFA咁爽？到賽車場前一刻宣佈：「全新日本本土版 Wish！」噢，嗰刻的確有啲失望，不過當我落場揸咗幾個圈後，發現自己忍唔住越飆越快、彎位越入越貼，先真正感受到換上 VALVEMATIC引擎嘅 Wish原來咁好玩，各位爸爸，你哋有福喇！
■ VALVEMATIC車章代表慳油又環保嘅新引擎。
一向雄踞七人車 MPV市場嘅豐田，舊年已不停催谷尺碼最細嘅七人車 Wish，估唔到今年主角仍然係佢。大陣仗拉隊過日本，豐田代理皇冠無非想同傳媒強調未來兩大新方向，第一，可能受美國回收風波困擾，下半年到港新車都以日本本土版為主；第二，就係等大家試真豐田副全新研發嘅 VALVEMATIC偈，因為佢將會逐漸成為各款 2公升容積新車嘅心臟。
新偈大力唔大食
■揸住部全新 Wish 2.0於賽道上試車，第一次感受到七人車跑起上嚟都好好玩。
據日本豐田製品企劃總經理大井先生講，花咗約 4年時間研發嘅 VALVEMATIC，係豐田喺引擎技術上嘅一大突破，透過電腦控制進氣閥開關時間及大小，以引入更多空氣幫助燃燒，進而提升馬力及加速反應嘅同時，亦將燃油減到最低達致慳錢又環保嘅效果。道理大家都明，實際上 Wish勁咗幾多？比起上一代 Wish 2.0，同樣 2公升容積，馬力提升咗 18匹，扭力則增加 7Nm，燃油亦減至 15.5km/L，以每公升油$14計算，約$0.9/km，實在好抵。其實要將 VALVEMATIC引擎嘅性能發揮得最好，原來 2.5公升容積先係最佳，但限制於 CVT波箱只適合 2.4公升以下嘅引擎，所以全新 Wish暫時只得 2.0及 1.8版本。
內外升級更跑化
■車尾 M字形泵把加強咗車尾嘅立體線條，抵讚。
落到場，當然要試 VALVEMATIC引擎嘅實力，起步反應明顯比以前爽快， 1.2公里長嘅賽道有幾個大小彎及障礙物，操控一向輕鬆舒服嘅 Wish當然唔難應付。兜咗幾個圈摸熟賽道後，對腳開始越踩越深，礙於七人車嘅車身及懸掛，感覺難免有點飄。由於大部份 Wish車主係愛飆車嘅年輕爸爸，全新嘅 Wish 2.0加咗 Dynamic Sport Mode，換上七速 CVT波箱，連同循迹控制及電軚嘅配合，刻意將 Wish 2.0跑化。啟動 Sport Mode，發現貼地性能及軚感轉變都幾明顯，每次高速入彎後營造出嚟嘅響胎聲，實在令人越飆越過癮，亦終於明白唔落 Track係試唔到 Sport Mode嘅分野。至於外形及配備，最大分別係由 7座變 6座，中排兩張獨立座椅坐得更舒服，車頭一對牙仔鬼面罩更係新一代 Wish嘅標記，內櫳以紅線縫製嘅點綴及兩側拋沙板嘅動感包圍都係 Wish 2.0獨有嘅特色，內外都強化咗跑味，各位爸爸不妨諗諗送自己呢份咁好玩嘅父親節禮物啦。
大細彎考學生
今次試車嘅賽道位於成田附近，係一間名為 NATS嘅日本自動車大學嘅賽道，學校提供學位課程教授學生有關汽車維修或改裝嘅知識。 1.2公里嘅賽道雖然唔算長，但唔同形狀嘅彎位刻意為試車而設，若有得鬥高卡車應該仲開心。
1.頭燈新增自動光線高低調校功能，令車主黑夜飆車更方便。而牙仔鬼面罩更是 Wish 2.0的標誌。
2.Wish 2.0獨有兩側拋沙板包圍誇張輪拱線條設計。
3.由四速改為七速，玩起加減撥片時更暢快。
4.VALVEMATIC引擎不但令馬力提升至 158匹，起步更爽先最有用。
5.由 7座變 6座，中排兩張獨立椅中間多咗條走廊，唔使摺椅咁辛苦。
6.新增以紅線縫製嘅波棍凸顯跑味。
Wish 2.0規格
引擎： 1,986cc直四 16雙頂 VALVEMATIC
馬力： 158PS/6,200rpm
扭力： 196Nm/4,400rpm
傳動：七前速超級智慧型無段變速自動波連+/-
售價：$279,700起
■啟動 Sport mode後，即使要入呢個 180°大鎖匙彎，你都會發覺可以好貼。
歡迎光臨 公仔箱論壇 (http://www3.tvboxnow.com/)
Powered by Discuz! 7.0.0
