英超周一晚難得上演由曼聯主場對阿仙奴嘅超重量級大戰，安高就撐硬紅魔鬼，事關佢哋個首席球星朗尼原來係兵工廠剋星，佢同貝碧托夫又一向合作無間，魔童反彈都係睇呢鋪，今晚曼聯讓半一，安高捧上盤。（有線201、301及廣東體育周二凌晨4:00直播）

兩大班霸今季同車仔、曼城喺聯賽榜鬥到難分難解，今仗勝負自然對冠軍之爭有重大影響，安高睇好紅魔鬼，最重要係睇好朗尼可以反彈發威。事實上，朗尼自上月下旬復出以來踢咗4場波，雖然仲未有入球，但就明顯一場比一場進步，紅魔鬼前線有佢，球員走位的確生好多。上仗「魔童」已經有射中楣嘅紀錄，今次重拾射門鞋絕對唔係奇事。

更重要係，「魔童」原來同阿仙奴幾有緣，除咗上季兩鬥阿仙奴都有入波之外，佢嘅超聯首個入球、為曼聯取得嘅首個聯賽「士哥」，以至個人英超第100個入波，都係攻破兵工廠大門取得，真係唔到你唔信邪！再者，朗尼拍檔貝碧托夫今季大翻身，至今取得11個聯賽入球排射手榜榜首，原來當中有10球係喺「魔童」同時上陣期間取得。仲有一點，紅魔鬼近兩仗分別不敵韋斯咸同賽和華倫西亞，查實唔係夫添，一班主力都抖咗幾耐吓，今晚強陣出擊，就連里奧費迪南同史高斯兩個重心都話及時傷愈，自然更值得睇好。

兵工廠方面，今季表現神勇，唔少人都當佢哋踏入收成期，只不過安高最擔心係，佢哋根本未受考驗，家陣嘅輝煌戰績只係虛火。睇番往績，阿仙奴原來近年撞上車仔同紅魔鬼兩大班霸，對上10次係錄得1和9負恐怖劣績，最慘係佢哋個中場重心法比加斯仲要有傷在身，就算勉強出賽都難有好演出，仲點捧得過？

‧今季平均每5次射門入1球，命中率英超最高。

‧聯賽開季15戰不敗為費格遜領軍以來最佳成績。

阿仙奴半場頂得住

‧近8場未試過半場落後，6次領先2次打和。

‧今季聯賽客戰得17分為英超作客王。