公仔箱論壇 - Powered by Discuz! Board

標題: [新聞] 傑斯同肚皮舞女郎喪玩 [打印本頁]

作者: lewistai 時間: 2011-7-28 02:45 PM 標題: 傑斯同肚皮舞女郎喪玩

豁出去！傑斯喺今個夏天人格破產，冇嘢再需要避忌囉，所以早幾日喺紐約夜店跳上枱同肚皮舞女郎跳辣身舞，預咗俾人唱都冇有怕囉。
曼聯今次美國之旅成績好，領隊費格遜似乎都冇好似平日管得咁嚴，隻眼開隻眼閉，由得班嘩鬼出去蒲。傑斯、里奧費迪南和朗尼等人禮拜日晚喺紐約一間夜店大解放，一見有肚皮舞女郎走出嚟就 high晒，最 high係今夏新聞人物傑斯，同個女郎忘情跳舞，隊友就攞咗肚皮舞女郎嘅頭飾、面具嚟戴，仲為傑斯吶喊助威，怕且仲齊心過平時喺球場踢波。
雖然傑斯同班隊友玩到癲，但部份喺凌晨 1點就鳴金收兵，就算部份轉移陣地飲嘢，仲請同場女士飲番幾杯，但到 4點都同女士講拜拜，冇下文，乖乖爬上隊巴返歸。

朗尼行 catwalk變鵪鶉
查實曼聯兵今次美國之旅行程好密，除咗比賽又要出席好多應酬活動，球會放生球員輕鬆一吓都好合理。
好似前日成班球員就出席紐約一個時裝展，朗尼、里奧費迪南、奧雲、朴智星同埋「小豆」查維亞靴南迪斯齊齊客串行天橋，為曼聯慈善基金籌款。球員行天橋嘅態度好唔同，朗尼同星仔一齊出場，表情好唔自然，朗尼做一個叉手動作個樣好尷尬，驟眼睇仲有啲臉紅添。回想幾晚前朗尼為傑斯吶喊助威時嗌得好放，估唔到一上台就變成鵪鶉。
「小豆」嘅拍檔係拿尼，兩個畀人感覺就有啲 chok，睇拿尼個作狀樣，唔通真係當自己係新 C朗？搞咁多嘢都係假，都係貝碧托夫見慣世面，保持笑容輕鬆行完，有個淡定拍檔照住，連莊尼伊雲斯一樣笑容自然，唔緊張、唔使 chok住過關。

[attach]1438224[/attach] [attach]1438225[/attach]

歡迎光臨公仔箱論壇 (http://www3.tvboxnow.com/)