公仔箱論壇 - Powered by Discuz! Board

標題: [資訊] 日迷試棍86揸二波先爽 [打印本頁]

作者: nt1972 時間: 2012-8-2 07:55 AM 標題: 日迷試棍86揸二波先爽

飆車始終係男人天性，有幾多個甘心日日揸住架七人車做柴可夫？豐田86的出現，頓時挑起不少老竇的欲望，尤其一班飢渴已久的日本跑車迷。今次找來同樣是日本車迷的豐田 Corolla Club會員試玩棍波版86，看看呢部 Dream Car是否如他們所料？究竟支棍好唔好揸？坦坦白白逐一細數。

手波操控更自主以經典姿態回歸的豐田86，令好多本來已修心養性的老竇再次身痕，香港代理於四月尾已火速送來一部86樣本車給一眾車迷止痕。不過，樣本車的跑車配件未足料，又得自動波，又點會夠喉。大部份車迷都認為買86呢類後驅雙門跑車當然要揀棍波，較自主性的操控會帶來更大的飆車樂趣。隨後六月到港的86 Demo Car是真正發售版本，有齊前後霧燈、縫上紅線的栢皮內櫳、金屬腳踏及加減波撥片等配備令86跑樣更凸出，還醒目地選配了六前速手動波箱，讓大家有機會一試棍波86的表現。今次找來豐田 Corolla Club五位會員出來試駕86，以車迷角度評價這部熱話的 Dream Car。

操控設定做得好Corolla Club前任會長 Polo之前未試車已訂購了一台86棍波：「點解？有型囉！勁囉！你睇呢個三角形尾霧燈，普通車無㗎，哈哈！」對改裝甚有研究的 Polo已喺美國訂定一大堆補品：「美國跑車零件質素幾好㗎，價錢又比日本平。」小試一轉後：「避震、蝦鬚、胎軨同死氣喉都會改，其次係馬力實在太細喇，一定要加 Turbo先好玩。不過，操控嘅設定做得幾好，腳踏、軚感好靈活，踭趾位又暢順。」至於波箱表現，他則認為，「起碼去到四千幾轉先有力。」

估唔到入彎咁穩定03年接棒擔任會長一職的阿錢，對日本車了解一啲都唔淺，對 Corolla更是情有獨鍾。試駕86後：「感覺良好，懸掛比例幾好，估唔到入彎咁穩定。波棍亦好暢順，入一二三波都好順，可惜起步力量差啲，一波感覺起唔到圍，不似其他跑車咁有嗰種推背感。可以加大頭段起步力量，效果會好得多。」

二波開始有力到只愛揸棍波車的成哥最欣賞86的尺碼同外形，作為爸爸的他，想法亦特別顧家：「若遲啲可以出部四門86就最好，日產 Skyline都有啦，一定可以多一班家庭客。」問到六速手動波箱的反應如何？「轉二波時先開始有力到，二波後再加速嘅感覺比較爽快，加上入彎好穩定，好好玩！」

唔似兩公升引擎試得最耐的 Michael幾乎唔想落車，話要試清楚，「買得86梗係要棍波，控制兩個腳踏同三個腳踏係兩回事，唔好有太多電子嘢，感受吓人車合一、棍波協調嘅樂趣，玩86就係想要機動少少嘅操控。不過試完發現佢力量唔太夠，唔似一架兩公升引擎嘅汽車，可能要加裝一啲賽車配件。」

馬力大啲會較好家揸緊豐田 RUNX的 Steven雖然資歷最淺，但對日本車也甚有研究，好冧86，「以雙門跑車嚟講，86嘅外形的確幾靚，相比我部 RUNX，86靈活些少，不過加速力唔夠，馬力大啲會比較好，家好似得把靚聲而無實際力量。」

豐田86
引擎：1,998cc水平對向四汽缸
馬力：200PS/7,000rpm
扭力：205Nm/6,400-6,600rpm
傳動：六前速手波，後驅
售價：$375,200

歡迎光臨公仔箱論壇 (http://www3.tvboxnow.com/)