公仔箱論壇 - Powered by Discuz! Board

標題: 馬高賽後評：二月七日沙田十場泥草日馬 [打印本頁]

作者: nt1972 時間: 2015-2-8 04:37 AM 標題: 馬高賽後評：二月七日沙田十場泥草日馬

第一場：「永得米」潘頓早段死搶同大熱「年年好運」鬥燒兩敗俱傷，棄騎「榮光大道」有快步速幫手縮程大勝，何其巧合！後駒今場唔作得準。「鑽飾天使」減夠分，去胡森度隨時幫佢贏到兩 W 。「彩球」兩仗內必到位。「豐華盛甲」泥地一哩步速較啱。

第二場：「北非諜影」排一檔衰位都衝贏，今場水準咪睇得太高。「和平開心」紀仁安如肯早點發力贏馬會係佢。「大收成」終點前腳軟唔知同匆出有冇關。「及時取勝」早段局搶影響拉士，再出抽番好檔位篤定補中。「花紅」冇乜速度應該唔係短途馬。

第三場：「金叻星」睇準形勢又爆一場，以呢個馬房手法再出多數冇。「大家熊」三歲馬縮程即跑番好，肯再跑千四可補中。「紫電明珠」跑第三恰如其份，呢個分差唔多。「翡翠寶寶」又係得個近字，長追冇着數。「特務飛龍」睇嚟千二好啲。

第四場：「大把籌碼」頭段放到咁快，返嚟唔斷至奇，呢個分應該有得贏。「愛頑皮」升班跑落都有前有後，今季仲有得 W 。「真如燕」養番好，馬房會盡用。「偉寶之星」力騎都跟唔到，要試吓增程。「紅褲仔」連續兩場曳，暫時咪沾手。

第五場：「超有利」初配潘頓贏來從未如此輕鬆過，上三班都仲有得贏。「一哥」全程留到口擘擘，今場唔作得準。「喜威威」縮番千四會唔同。「金剛仔」加程追到第二，北半球自購馬似乎搵啱出路。「菁英神采」換雷神都冇料到，暫時唔好睇得太高。

第六場：雷神揀「霸氣」果然無錯，不過只係僅僅捱到，加分後唔值熱捧。「嫡愛」久休都近，若非末段唔夠位應有 Q 。「頌友」目前評分易位難贏。「執到寶」小休後衝落唔勁。「步步威」停過課果然有影響。「心花怒放」四班都贏唔到，三班點夠跑。

第七場：「金鹿」上二班要再進步先有得贏。「御皇鷹」馬房似想用盡為止。「加州金獎」第三人棄我取。「確威龍」田草都近，返谷草短途有得贏。「活力寶」全程外叠望空蝕唔起。

第八場：「威爾頓」拉士一有馬拍上即自動加速標前，馬王果然鬥心一流。「包裝鬥士」僅敗，杜滿萊手風弱冇計。「多名利」狀態弗番，大摩會幫佢贏番場。「喜蓮巨星」明顯係吳嘉晉騎輸。

第九場：「觀自在」僅敗輸磅重。「紅駿」莫雷拉睇住嚟贏，上二班孭輕磅咪睇小。「軍火」已盡所能，北半球馬跑落仲有進步。「好主意」全程四叠望空，巫斯義咁跑法唔輸就奇。

第十場：「比卡超」不斷進步，加完分仲有得贏。「魚躍鳥飛」慳晒位衝落都冇，近況仲未返去贏馬時。「天時駿駒」賺晒檔位及跑道形勢都僅敗，加分後更難贏。「歡樂時光」確認跑唔番。

歡迎光臨公仔箱論壇 (http://www3.tvboxnow.com/)