公仔箱論壇 - Powered by Discuz! Board

標題: 賽後評：三月二十一日沙田十場泥草日馬 [打印本頁]

作者: nt1972 時間: 2015-3-22 04:39 AM 標題: 賽後評：三月二十一日沙田十場泥草日馬

第一場：「福盃滿賞」排一檔賺盡形勢贏，再出未必咁好彩。「皇龍大師」減分太多，只要復蘇草地一樣惡。「皇帝諭令」放或留最叻又係第四，放棄吧！「帶利來」點計一哩都好過 1 8 0 0 米。「永常勝」要跑 2 0 0 0 以上至發揮到威力，現評分會有得贏。

第二場：「電子群英」試閘走勢好即贏唔意外，唔升班篤定添食。「飛躍成功」未見真章。「甜蜜蜜」追番近，好快會交代。「快樂世紀」唔係短途馬。「翡翠紅星」、「花紅」輸內檔難跑，下場抽好檔會唔同。「勇士勁」貼欄追好多，再出有糊叫。

第三場：「中國好」九歲都可以贏，可想而知呢組馬幾水。「金瀛」潘頓早段拉到口擘擘，難贏馬唔值得大熱。「太陽辰」柏寶外檔跑啱晒都係第二，呢個馬房下場變熱小心。「環保之星」黃皓楠騎唔郁都追番好多，下場換個大師傅會唔同。

第四場：「榮光大道」返四班再執一場，大熟馬可持續反彈。「現代財星」已跑啱晒，輸俾強手無話可說，再出篤定補中。「翡翠寶寶」轉彎大外叠都上名，落五班可贏番場。「快快贏」三檔唔搶注定冇運行。「超現寶」加罩搶放輸近已試準，嘜實佢。

第五場：「添丁發財」越贏越易，來港插三班之馬仲有反彈空間。「雅寶」一再證明料子有限，追熱 W 唔值。「勇駒」輸質不如人，不過計馬喺四班有得贏。「得全勝」頭兩段放得急都有第四，只因其他馬太水。「真霸龍」有啲追勁，鼻血馬出得都會砌。

第六場：「鄉村輝煌」慢閘失機，再跑直路賽可贏第三 W 。「御鋒」八歲馬今季兩 W 已超額完成。「忠心義氣」場場近，返谷可開齋。「美麗皇者」北半球馬進度嚟得快，告仔會好快交代。「威威具星」分減到差唔多，返谷草就要睇。

第七場：「萬事欣」贏來點到即止可再追。「手到拿來」呢個分易位難贏。「伽楠」落飛似捧人多過捧馬。「勝任如意」三班田草都上名，證明進步好大。「真好漢」初出走光，睇吓鄭俊偉點部署。

第八場：「金剛仔」贏在一檔慳位，相反「超有利」全程外叠蝕，再出排好檔可補中。「電光火石」轉廐初出試馬唔差，告仔實搞得佢掂。「索咖啡」贏得使咩用莫雷拉，下次換人退熱要捧。「勝算高」落班跑谷草要睇。

第九場：「英勇大師」全程外叠無遮擋輸形勢，今場唔作得準。「追風駿足」又做阿二，去到呢個分似有阻力。「熊英雄」傷患馬能勤跑，遲早爆一場。「左右逢源」草地都近，跑番泥買得。

第十場：「包裝奔馳」換雷神排番內檔，補中合理。「行善積福」勝在準，但呢個分易位難贏。「天才」睇腳法跑千六仲好。「獨具慧眼」莫雷拉騎番就要買。「總統至上」輸在走外叠，唔好咁快睇死佢。

歡迎光臨公仔箱論壇 (http://www3.tvboxnow.com/)