公仔箱論壇 - Powered by Discuz! Board

標題: 賽後評：七月五日沙田十一場泥草日馬 [打印本頁]

作者: nt1972 時間: 2015-7-6 05:36 AM 標題: 賽後評：七月五日沙田十一場泥草日馬

第一場：「人民武士」贏來似險實易，可以鎖定係新季銀行馬。「經典帝國」轉倉初出即有 Q ，胡森又少一隻攞分皇牌。「順其自然」走勢好均速，插班後見加程就要留意。

第二場：「有意思」雖僅捱到但姿態篤定，返四班輕磅會仲好。「兄弟醒」唔搶根本冇運行，擺明怕咗前駒。「財神駕到」五班有分在手，但馬房揀飲擇食！「南華勇將」周三返谷草抽好位會唔同。

第三場：「飛霞」加眼罩仲衰過以前，唔除唔使諗。「特務飛龍」巫斯義肯用心跑根本唔同級數！「至尊駿爵」五升四兼谷轉田，點值咁熱門？「神舟小子」返田草即變身，已搵到評分反彈位。「天地福星」始終谷草較有把握。「精益旅程」四班實力一般。

第四場：「勇士勁」繼續單騎表演，三班絕冇阻力。「添丁發財」唞唞又交番水準，確認四班夠爭。「超好玩」現真面目，下季最少兩 W 在手。「旅英駿爵」沿途搶口太稚嫩，但馬能力應唔差。「育成群駒」場場得個追字。「加州卓越」馬房已收爐等下季。

第五場：韋達揀「田黃」唔騎「家品大王」果然一箸夾中，後駒換潘頓一 Q 返，馬迷點夠佢諗？「榮光大道」臨場票數軟弱，陣上跑嚟即腳軟！「現代財星」雷神搏極都贏唔到，換柏寶唔通識飛？「雄心勁龍」跑唔番減幾多分都冇用！「信心出擊」減夠分。

第六場：「拼搏小子」絕對係薛寶力在港代表作，但諗唔明一話冇牌即判若兩人？「友瑩養」人馬均已盡全力。「權杖神駒」羅理雅直路攞位論盡，應贏變輸！「高利多」沿途內閃難騎第三全靠柏寶。「神電金剛」田草都近，周三谷草泠要睇。

第七場：柏寶揀騎「藍天飛馬」卻全程封死棄騎「太陽驕子」齊齊攬炒，真係唔明！從後駒睇到韋達唔敢搶位已不復當年勇。「巨無霸」一再試準，新季必能贏上二班。「金碧陽光」三班易位難贏。「正大光明」巫斯義再演功架。「赤龍駒」收埋等下季用。

第八場：「兵工闖」回一回贏季內第五 W ，大摩谷馬出神入化！「黃金宅男」有心偷鷄奈何今季真係冇進步。「熱爆男」用連達文唔符合馬房作風。「方程式」排 1 2 檔難跑。「大威力」轉倉初出志在考驗，新季跑番草地起碼有兩 W 。「歡樂小子」三班難贏。

第九場：「金獅福將」健康養番好三班留佢唔住。「要風得鋒」夠準買 Q 唔慳得佢一票。「電子群英」次次抽衰檔冇計。「澤心星」谷草較有把握。「天心星」評分確認冇水位。「你好馬」初次跑近，加程要小心。「大勝利」抵港後完全睇唔到任何進步。

第十場：「安荃」用潘頓贏得清脆利落，人馬較雷神更夾。「勁趣」 1 8 0 0 米爆落勁啲。「聰明才智」時放時留，呢幾場賽績咪作準。「新力鷹」、「同個世界」唔放等同未跑已投降！「進綵」加程初入位，睇時間唔係符碌。「幸運勝利」返三班至有運行。

第十一場：「大寶藏」上場田草 1 4 0 0 米已追近，轉跑盲門泥地問你點敢追？「霸氣」段段快都唔斷，証明泥地確係利害。「海紅寶」交番本身應有水準。「執到寶」一步都冇輸到唔似真！「心花怒放」三班只有爭 P 能力。「劍飛聲」季內已 1 6 戰走樣好合理。

歡迎光臨公仔箱論壇 (http://www3.tvboxnow.com/)