公仔箱論壇 - Powered by Discuz! Board

標題: [新聞] 蘋人誌：俠女在民間給豬朋狗友一個家 [打印本頁]

作者: itsctsu 時間: 2019-2-5 12:04 PM 標題: 蘋人誌：俠女在民間給豬朋狗友一個家

本帖最後由 itsctsu 於 2019-2-5 12:08 PM 編輯

BuBu是中心13年來拯救的第一頭豬，入住狗舍與狗為鄰，豬朋狗友相處融洽。

面對300磅巨豬，兩隻黃色唐狗B滿面好奇，輪流細步行近聞聞豬尾，大膽一點那隻，索性舔舐豬頭示好。踏入農曆新年，人人都說送狗迎豬，流浮山這個狗場，半年前來了一隻花豬，有義工為牠設立粉絲專頁，人氣極旺。拯救遺棄寵物中心（RCAP）創辦人黃慧賢打趣謂，「豬朋狗友」相處良好，「狗又好、豬又好，都係寶貴生命」。相信眾生平等，努力實踐照顧一生的承諾，這個打兩份工補貼狗場開支的鐵娘子說：「人類沒權扼殺另一個生命。」不管是狗是豬還是貓，愛動物更甚於愛自己的俠女如是說。

撰文︰呂麗嬋
攝影︰許頌明

減肥中的BuBu見菜即搶。

與狗結緣的黃慧賢為動物耗盡心神，她說很值得。

乘小巴由元朗往下白泥，離遠看見噴有七彩塗鴉「RCAP」的鐵皮，下車後站在狗場門口，不用按門鈴，已傳來此起彼落的狗吠聲，像另類交響樂曲。閘門打開，前來迎接的，除了黃慧賢（Sa姐），還有坐着輪椅的唐狗OT和健太。3萬方呎狗場，是400隻流浪小狗的庇護站，上年8月，中心迎來成立13年來首隻豬，黃形容是上天巧合的安排。「呢度前身係荒廢豬場，但我哋就從未養過豬，以為豬只鍾意食同瞓，原來跑得好快」。追着衫尾討吃、埋頭埋腦咬鞋，像她熟悉的BB狗，不同者是300磅小豬嘜一點也不小，還力大無窮。

「初初見到佢都幾驚，唔係，係家都仲驚驚哋。」站在一旁身形嬌小的狗場義工Joyce吐吐舌的說。黃說：「上年8月，朝早突然接到四、五個義工來電，問中心可唔可以收留隻豬……嗰時我仲一頭霧水。」事緣上水一個農場原本飼養了兩頭豬作寵物，卻被漁農自然護理署指違規；原來一個農場只准養一頭豬，而被勒令帶走的，正是兩歲半的BuBu，有網友在網上作「救救BuBu」的呼籲，沒一陣就有人向好心的黃慧賢叩門。只是，沒養豬經驗，就是心口有個勇字，黃直言也一度猶豫：「擔心唔識養，又怕同啲狗相處唔到。」

乘小巴由元朗往下白泥，離遠看見塗鴉「RCAP」，內裏就是400隻毛孩的家。

狗場也有被棄養的名種狗，包括有多次咬人紀錄的柴犬兜兜。

一飯四餸　減肥豬愛食車厘茄
思前想後，還是心軟，如是者，BuBu就成為中心拯救的第一頭豬，獲安排入住狗舍，與眾狗為鄰。來到狗場，黃慧賢第一時間為BuBu鬆綁，還牠自由，每天讓牠在空地自由活動。「可能因為周圍都係狗吠，佢初嚟唔係好慣，每次散步，一行出自己間房，一定會周圍八卦」。離開熟悉的豬朋，走進400毛孩的大家庭，無奈「被狗圍」，就連300磅的「巨無霸」亦深感不安，黃笑說好在BuBu性格隨遇而安，大概只一、兩個小時，已無懼狗友，安心大覺瞓。

「佢有個大肚腩，肥到行路貼晒地，初嚟到又唔願郁，慢動作，成日瞓喺度，企一陣就要坐低」。肚大腳幼，行路搖搖晃晃，初來報到，安頓好住處，黃慧賢即着手為BuBu製訂「減肥餐單」。「除咗飯，佢最鍾意食車厘茄同粟米，菜唔係樣樣食，只愛生菜同油麥菜，佢家都係一飯四餸，不過就減量，總算見返條腰！」相處近半年，黃慧賢笑說已熟知BuBu是隻食極唔飽的「為食豬仔」，喜歡跟着人討吃，又像狗一樣「識聽自己個名」，十分醒目。

遇好心人打救豬命、豬狗相處尚算融洽，但豬如人生，總遇順流逆流。搬家未夠一個月，9月山竹來襲，總是首當其衝的狗場如臨大敵，初來報到的肥豬亦難倖免。「之前天鴿，呢度浸晒，幾百隻狗載浮載沉，我唔知豬識唔識游水，唔擔心就假」。經歷天鴿慘痛一役，黃說今次做足準備：「部份狗一早拎咗去暫託，BuBu就移咗去最遠又最近門口間房，水浸太深都比較容易走到……」加上水馬和沙包陣，這隻流浮山上的「挪亞方舟」沒有沉，人狗豬都沒死傷。

共歷過患難，加上是狗場的「獨有品種」，黃慧賢說BuBu很快已搖身成了這裏的明星，有義工甚至為牠開了名為「Bu Bu Pig Piggyland奇幻世界」的粉絲專頁，不時更新生活日常；又有市民定期帶車厘茄探望打卡，儼如「豬界忌廉哥」，人氣極旺。「我冇時間，又唔係好識電腦，呢啲都係義工搞。講真，呢度連埋我得幾個人，要照顧400隻狗，仲有新嚟嘅BuBu，冇義工幫忙，根本搞唔掂」。

餵食、洗倉、沖涼，帶病狗看醫生，還有安排領養，打理24小時運作的狗場，基本上已忙得不可開交，但黃慧賢晚上還得到漆油廠通宵工作，每日中港兩地走，只為補貼狗場開支，「打理狗場係好困身，間廠親戚開，返工比較彈性，加上我咁嘅年紀，所以就算遠都要做，要瞓咪喺車度瞓囉」。剛「登六」的她早年離婚，這個長年晚上只睡在車上的鐵娘子，苦笑謂中心是慈善機構形式運作，過去十幾年已耗盡積蓄，現時面對的是「六個蓋冚十個煲」，不打工支撐，難以維持。

日做兩份工　養活400隻毛孩
為毛孩奔走，手沒停，狗場義工Joyce形容黃慧賢是「incredible woman」（不可思議的女人）：「我係好尊敬佢，從來冇見過一個人好似佢咁，日做夜做好似唔使休息咁，講真係會擔心，知道佢一直死頂，忍唔住都會叫佢唔好只係一個人死做爛做，要識搵人幫手」。兩年前因為16歲愛犬過世，Joyce想捐出狗糧清潔液等物資而認識黃慧賢，「唔係乜值錢嘢，只係唔想嘥，我打過去好多機構都話唔要，只有呢度叫我拎去，佢哋唔一定要你捐錢，你嚟幫手一樣歡迎，係真心對待毛孩」。

眼看狗場艱苦經營，黃慧賢又是只懂埋頭苦幹的老式人，經營韓國時裝網店的小妮子就義務為中心建立網頁，定期更新資訊，又助養了中心內兩隻小狗，視這裏如第二個家。「我嘅工作時間比較彈性，都係抱住幫得幾多得幾多心態，有啲義工住到將軍澳咁遠都入嚟幫手，嗰啲先係真正難得，其實大家都唔想見到Sa姐咁辛苦，想幫輕吓佢。」Joyce說。狗場運作13年，出錢出力出心的黃慧賢，說再辛苦都希望堅持下去，盡全力兌現對動物一生的承諾。

她說：「人狗貓豬都係平等，都係生命，人類根本無權扼殺另一個生命。」為遇意外的唐狗造輪椅、拯救被撞需截肢的小狗，醫一隻狗動輒八、九萬，是否值得？她直言每個人的價值觀不同，就算被質疑也無所謂，「狗又好、豬又好，都係寶貴生命，唔想只係畀嘢佢食、畀地方佢住就算，希望佢哋生活得開心，唔使成日被關喺籠度，可以每日出嚟玩吓、散吓步……」13年來只上月放過三日假，但都是去台南探訪當地狗場取經，全因希望在能力範圍內做得更好。

香港的流浪狗大多是唐狗，中心現時收留的400隻毛孩九成是唐狗，當中三分二以上都是起碼10歲的老狗，其餘的，有12歲七癆八傷的金毛、有樣靚但慣性咬人的柴犬，也有一天到晚狂吠不止的貴婦。不同的性格特點，就算是名種狗，要找主人也不容易，「近幾年多咗人認識唐狗，知道佢哋品性乖又易教，但香港人為口奔馳、生活空間有限，係永恒嘅難題」。盡力為救回來的狗尋找領養人，尋不到家的，就照顧牠們終老，這是黃慧賢成立RCAP的目的，也是她13年來對自己的承諾。

「呢度最老嘅狗有18歲，嚟嘅時候已經5、6歲，幾年前先走……好多狗你救到固然開心，就算救唔到但你盡咗力，至少唔會有遺憾」。與狗結緣，讓她賠上自己的人生，但她說還是很值得，「當年住村屋，每晚返屋企，後面總會有狗狗尾隨，起初係一隻，後來越跟越多，好似護送我歸家一樣」。久而久之心裏萌生幫助更多流浪動物的念頭，只是那些年她仍是生意人，懂計數自然不會「下海」，及後離婚，再無太多牽掛，促成RCAP的成立，成就今日的她。

「13年嚟中心只搬過一次，算好幸運，之前喺尖鼻嘴，因為村民投訴而搬遷，後來遇到好業主，唔使再搬來搬去」。現時以狗場為家，她謂辛苦卻不孤單：「好似之前打風天鴿山竹，成個場浸晒，水退之後變晒泥狗，要叫水車嚟集體沖涼，唔係義工幫手，只有我哋幾個根本冇可能做到」。她說：「就算BuBu係豬，一樣愛乾淨，要沖涼」。總是將心比己，遇上這樣一個愛動物更甚於愛自己的俠女，流浮山狗場內的「豬朋狗友」，命不該絕。

作者: manyiu 時間: 2019-2-5 12:31 PM

小動物真幸運, 遇到呢位好心阿 E !

歡迎光臨公仔箱論壇 (http://www3.tvboxnow.com/)