標題: 限量Cayman S Sport享受注目 [打印本頁] 作者: nt1972 時間: 2008-12-31 01:45 PM 標題: 限量Cayman S Sport享受注目
揸保時捷係唔少男士嘅夢想，假如有機會擁有一部限量版嘅「波子」，就更加難能可貴。這部Porsche Cayman S Sport的全球配額只有700部，想成為其中的一分子就要快啲行動，皆因香港配額得番幾部，諗多兩諗隨時走寶！
「飄飄然」出巡
相信不少讀者仍有印象，其實代理在月初已引進了Cayman S Sport Limited Edition到港，由於當時還未有試車的機會，只能夠在陳列室拍照讓車迷止渴。日前，筆者終於試駕過呢部招搖度十足嘅Cayman。此車性能強橫已是意料中事，而途人的反應更令人感到「飄飄然」，可以話去到邊都畀人「＇」到實。無疑，黑色車身配以橙色拉花、倒後鏡及19吋輪圈，加上限量版獨有的黑色「Cayman S」徽章及跑化排氣喉，你話唔引人目光就是騙你的！試車當日，代理話市區多車難以發揮部車嘅性能。不過，那刻筆者反而幾享受塞車所帶來的樂趣！
303hp推背感強
性能方面，Cayman S Sport Limited Edition搭載了一副3.4公升水平對向6汽缸引擎，規格跟現行的Cayman S相同，但馬力就由295hp提升至303hp。由於原廠已配備了Sport Chrono Package，加上主動式懸掛系統（PASM）可讓車身高度降低10mm，使加速力變得更狂野之餘，彎路極限也大大提高。原廠表示，當配上五前速 Tiptronic S波箱後，0~100km/h的加速只需6.1秒，難怪每畀一下油都可帶來強勁的推背感。同時，閣下亦毋須擔心馬力太大「揸唔掂」，只要不嚴重Over- speed及不關掉PSM車身穩定系統，基本上大部分的駕駛者也可控制自如，享受高速飛馳的快感。
車廂跑格昇華
為了凸顯限量版與別不同之處，車廂裝飾亦經過輕微的改動，無論軚環、手掣、波棍頭都改以Alcantara麖皮包裹，營造出濃厚的跑車風格。另一方面，出車標準已包括了BOSE音響、Bi-Xenon頭燈、Park Assist系統，基本上已相當齊料。曾聽過唔少人講，跑車空間狹窄、唔夠實用，但實際上並非如此。正如Cayman的中置引擎布局不僅可騰出150公升的前行李箱，連同尾玻璃下的260公升載物空間，鬥容量絕不遜於小型房車。現時，Cayman S Sport Limited Edition的基本售價僅為$1,058,000，想成為全球700位車主之一，其實都唔係咁難！
