公仔箱論壇 - Powered by Discuz! Board

標題: 極簡變極豪　 09 《愛蓮說》 [打印本頁]

作者: nt1972 時間: 2009-5-4 08:02 AM 標題: 極簡變極豪　 09 《愛蓮說》

揸過幾次 Lotus ，老實講，上落同坐都幾辛苦，蓮花車系浮誇搶眼，似乎車外人享受得更多。新版降臨，廠方大突破，車身線條由曲變直，活現縮水林寶外貌，驚人地塞入四座位，全皮櫳、 Touch Screen 、音響冷氣返晒嚟，由極簡變極豪， 09 年終於可認同《愛蓮說》。

a. 米皮桶椅白線車邊，為 Lotus 加入高貴典雅味。

中通外直　不蔓不枝
讀中學時，最鍾意聽四眼 Miss 講周敦頤嘅《愛蓮說》，一句「蓮之愛，同予者何人？」，講到明世人唔識貨，一窩蜂只愛牡丹、菊花，作者玩另類仲要有 Point 撐，好有格。情形就似周街林寶拉利波子，真係鍾情 Lotus 嘅人，自不然會對其輕巧靈活優越性心領神會。

09全新版 Evora 剛到港，外形變化頗大，收起過往超級誇張嘅浮凸身形，一改成較直線嘅組合，硬朗中帶點流線感，着實有點袖珍版林寶味道。沒有多餘碳纖、車頂入氣口、餐枱尾翼，簡單中顯露不簡單，貼近「中通外直，不蔓不枝」嘅境界。Evora 分雙座及四座版，同樣為單門跑車，不能不讚四座版嘅精巧，咁細架車仲夠膽塞 Dog Seat 落去，頂頭頂腳係必然之事，但嬌小女士或小朋友坐入去尚算 OK 嘅。

b. 全球中置引擎車款中，首創 2+2 座椅佈局，當然後排一樣頂腳。

c. 望住中控台， Evora 堪稱最豪華 Lotus 。

d. 到港 Sample 為左軚 6 速棍波版，未來出自動波機會不大。

e. 錶板用上幼線細字，配搭兩旁紅字 LCD ，擺明戰鬥格。

■ 中置引擎後難得仲有尾箱位，官方話擺得落一 Set 高球袋。

可遠觀　不可褻玩
內裝方面更屬革命性變化，全米色皮櫳連桶椅，車埋白線邊，充滿高貴典雅味。紅光錶板同指針，一堆幼線細字洋溢驃悍速度感，仲有多媒體 Touch Screen ，軚盤左邊幾粒功能鍵，撻車後更會由紅變綠，豪華及高科技感絕對打破 Lotus 過往慣例。

Lotus輕量化成熟，新車 Evora 用全鋁合金做底盤，車體抗扭曲剛性達到26,000Nm/degree ，原型底盤僅重 200kg ，全車豪裝加四座位，也只不過 1,350kg，難怪攞埋 2008 歐洲鋁材大獎最勁嘅評審團大獎。如此輕巧，令 280 匹 3.5L V6引擎創造出優異嘅 4.82kg/hp 馬力重量比，故 0-100km/h 只需 5.1 秒。借用埋「可遠觀而不可褻玩焉」，唔係叫你齋睇唔揸，正確解法係不可隨意玩弄， Evora 車輕、扭力高，未摸熟架車就踩大油，好易失控出事，都係學周敦頤咁當 Lotus 為君子，保留番恭敬之心好啲。

■ Evora 喺紐堡靈試車數據令工程師相當滿意。

■ 底擔用全鋁合金，僅重 200kg ，兼顧輕度硬度。

■ 側看 Evora 流線身形，不像 Elise 、 Exige 誇張的玲瓏浮凸。

規格
引擎： 3,456cc V6 引擎
馬力： 276hp/6,400rpm
扭力： 350Nm/4,700rpm
傳動： 6 前速手波
0-100km/h ： 5.1 秒
極速： 261km/h
售價： $980,000 起
查詢： Richburg Lotus

作者: ming6680 時間: 2009-5-4 08:27 AM

不错啊！很喜欢它的设计~
谢谢分享~

作者: edchau 時間: 2009-5-4 02:15 PM

Lotus always the best !!!!!!!

作者: yinyinyin1234 時間: 2009-5-4 04:55 PM

thanks for sharing

作者: wongkiss 時間: 2009-5-4 05:46 PM

好令仔呀><
但我而一生都可能買唔到

歡迎光臨公仔箱論壇 (http://www3.tvboxnow.com/)