公仔箱論壇 - Powered by Discuz! Board

標題: 舞 ‧ 達人 [打印本頁]

作者: nt1972 時間: 2009-6-16 08:15 AM 標題: 舞 ‧ 達人

唔怕你知，佢喺屯門屋邨大、十零歲無所事事跑去跟人學跳舞、為攞獎多次參加歌唱比賽。最怕你唔知，佢靠舞賺生活費，舞到組「軍團」 … … 係邊個？狄易達（ Dat ）。由十零歲跳舞跳到  家廿歲，學生多到組成「狄易達軍團」出騷表演，短短個多小時訪問笑不停，雙手雙腳動不絕。坦白講，  家仲有幾多個小伙子有問必答唔造作？

周身郁笑唔停
問 Dat 仔有咩 Dream Car 。「 C-class 又或者 Honda Spike ！」嚇嚫，後生仔竟然唔係揀跑車？「七人車都好，最好係一坐上去就舒服到瞓得着，載得人多，我屋企人多，又載到好多嘢，我平時練習登台好多隨身物品 … … 」 Dat 仔應該係個踏實顧家小伙子。話口未完，佢已跑去保母車揹「隨身物品」而至，除咗個大背囊，仲有結他，「學緊，成日練！」佢話「成日」，我信，因為喺採訪過程中，佢嘅手指、身體，甚或雙腳都郁唔停。坦白講，安排呢個採訪一啲都唔順利， Dat 仔早就度好期，可惜借車過程極不順利，最終根據 Dat 仔要求，找來「性能車仔」 Fiat 500Lounge ，不過就連天公亦不造美，整日大雨， Dat 仔依然笑逐顏開，還興致勃勃左摸右摸，「個音響系統幾好 … … 我好鍾意天窗。」

■ 忽發奇想要推車，仲要推足成百米！

■ Dat 仔一上車就望勻面板，第一時間試音響。

舞出軍團
記得當我向老細滙報想訪問狄易達，在場同事都異口同聲：「跳舞好叻嗰個？」原來 Dat 仔幾乎同「舞」畫上等號。「我細個住屋邨，無咩嘢玩，喺公園見到成班大哥哥跳舞，就膽粗粗叫哥哥教，就一路跳到  家！」唔知係咪因為咁， Dat 仔亦毫不吝嗇地教其他人跳舞，其中一班學生更係一般人眼中嘅壞分子，但就藉舞蹈重回正軌。直到現時為止，究竟 Dat 仔教過幾多學生呢？「無正式統計過，或者有 200多個吧！」兩年時間教咁多？仲邊有時間兼顧事業呀？你仲好似有個「狄易達軍團」？「  家無時間返去（新界北）教喇！軍團嘅成員會同我一齊跳舞，更會一齊出騷表演，嚟緊嘅九月份仲會公開招募團員㖭！」話題一轉，「試一轉 Fiat 有幾高性能 … … 」未講完人已經上咗車，搞笑。

試車時， Dat 仔一樣表現貪玩本色，天雨路滑一樣盡情踩，結果車速高時甩咗好幾次，佢就超興奮：「好正！」試完車落地，「成日見人推車，係咪真係咁易推呢 … …咦，真係推到！」結果就推咗成百米先推返轉頭。我投降，認老！

■ 對汽車座椅嘅一大要求：「最緊要舒服到想瞓！」

■ 「大天窗好，空氣流通又環保。」

■ 復刻款式的骰車仔，內裝設備齊全兼賣相可愛。

■ 錶板簡單但具備多種訊息提示。

■ 設有支援 iPod 及手提電話嘅 Handfree 系統。

■ Dat 仔對 Sport 模式好有興趣，按了多次！

後記無怨跳足 50 次
好多人將 Dat 仔嘅舞技同陳偉霆相提並論，我就請 Dat 仔喺 Fiat 500 前後左右展示舞姿，但雨太大，車身濕滑，動作變得甚有難度。結果為影一張大相 Dat 仔跳超過 50 次，不過無黑面無怨言，仲笑得好開心。攝影師都受感染，無懼雨打濕身，趴地狂影，人真係可以互動，情緒亦可相互感染，大雨下大家都玩得好開心。

規格
引擎： 1,368cc 直四
馬力： 100bhp/6,000rpm
扭力： 131Nm/4,250rpm
傳動：五前速 Dualogic 加減波
售價： $149,800

歡迎光臨公仔箱論壇 (http://www3.tvboxnow.com/)