公仔箱論壇 - Powered by Discuz! Board

標題: 法式 Smooth嗒真驚喜 [打印本頁]

作者: nt1972 時間: 2009-8-11 01:42 PM 標題: 法式 Smooth嗒真驚喜

法國品牌喺香港較冷門，要數光輝日子，都要追溯至標致 206大熱嘅時光。不過都係法國品牌嘅 Renault，今年突然搞作多多，相當進取，繼Koleos及 Kangoo後，又推出咗雙門跑房車 Laguna Coupe，都換嚟唔錯嘅評價。我就專誠同 LagunaCoupe嚟次長測，睇睇大家有無過譽。先評外形，線條 Smooth夠大方；再試操控，都係 Smooth，好爽！講真，有驚喜。

靚尾最具魅力近年香港車迷心目中嘅所謂靚車，都俾德國車壟斷，其實一向注重設計嘅法國品牌喺歐洲仍然大熱，好似Renault喺法國一樣大受歡迎。雷諾迷喺香港較少，自己本身亦較少接觸呢個品牌，一直都以為雷諾未能大熱嘅其中一個原因係佢嘅外形唔係香港人杯茶，但第一眼見到呢架全新雙門跑房車 Coupe，先發現係個誤解。優美嘅流線外形、炭灰色車身以電鍍銀邊作點綴，流線美態媲美寶馬125i，外形的確十分討好。車頭刻意保留住Laguna車系嘅造型，偏扁而特闊嘅巨型方格鬼面罩頗能凸顯法國品牌嘅與別不同。令我欣賞嘅仲有車尾立體線條設計，即使唔係太喜歡有尾車嘅我，一啲都唔覺得車尾礙眼，加埋一字排開嘅尾燈組合，實在幾吸引。美中不足係尾箱開口位略細，但靚同實用兩者取其一，我寧願有個靚尾。整體感覺斯文大方又有個性，適合一眾上班族，女仔揸一樣唔會感到唔相襯。

■最欣賞尾箱嘅立體線條，完全無老土感覺。

■ 17吋合金輪圈跟一般雙門跑房尺寸差唔多。

■車尾一字排開嘅尾燈組合帶出 Cool嘅味道。

■特闊鬼面罩差唔多遮蓋晒成個車頭，獨特有氣勢。

溫柔順住去

■後座空間十分寬闊，獨立座椅設計一樣包圍感十足。

外觀感覺帶來驚喜，上車實試之後同樣有刮目相看嘅感覺，車廂陳設同編排雖然偏向精簡，真皮內櫳用銀色金屬邊粉飾唔算太特別，但用料仔細嘅做工成功營造出豪華舒適嘅車廂氣氛。可能法國人嘅汽車設計一向側重細緻位，呢部Coupe亦唔例外，單係座椅嘅舒適度已經抵讚，承托力啱啱好，令我揸咗幾個鐘頭都唔覺攰。當然車廂空間充足，完全無侷促壓迫感，都應記一功。喺測試過程中，我刻意走唔同特點嘅路段，先嚟番段大直路，第一感覺，操作好暢順，加速反應好快好爽，再嚟曲折彎路，轉向表現都算靈活。

我本身對法國車無乜偏見，但都實在有啲驚喜。 2.0公升渦輪增壓引擎，最大馬力有170匹，當然，爆發力唔應該喺期望嘅範圍。有人批評佢嘅引擎表現只屬中規中矩，但我就覺得，對一般要求代步嘅駕駛者、特別係女生而言，六前速Pro-active自動波箱，配直接易控嘅+/-轉檔操控，已經有足夠嘅速度感，唔使下下似辣跑咁先開心。要讚嘅仲有柔韌度適中嘅懸掛系統、表現平衡自然嘅傳動系統，令入彎表現穩定，揸長途都十分輕鬆自在，唔會好似揸大型房車咁吃力，一路順住去嘅感覺，實在有啲唔想落車。

■黑底白光嘅型格錶板，中間有顯示屏提供行車資料。

■尾箱容量 450公升，摺合後座可變成 1,377公升。

■灰色全真皮內櫳用銀色電鍍配件點綴車頭內櫳，感覺簡潔踏實。

■菱形 Logo中間有輕觸式尾箱按鈕，設計顯心思。

■車身長 4,695mm、闊 2,060mm、高 1,445mm，十分輕巧。

Renault Laguna Coupe規格
引擎： 1,998cc直四渦輪增壓 DOHC
馬力： 170bhp/5,000rpm
扭力： 270Nm/3,250rpm
傳動：六前速自動配+/-，前驅
售價：$438,000

作者: 全勝 時間: 2009-8-13 07:09 PM

加油!♇感謝分享。♠

作者: Marekclaretta 時間: 2009-8-23 08:18 AM

thank you for sharing

歡迎光臨公仔箱論壇 (http://www3.tvboxnow.com/)