公仔箱論壇 - Powered by Discuz! Board

標題: 開篷黑馬全天候 Show Off [打印本頁]

作者: nt1972 時間: 2010-3-21 05:55 AM 標題: 開篷黑馬全天候 Show Off

1系定位本來係玩揭背車仔，自從 135i硬頂同開篷雙雙爆出後，家陣連 120i都追加埋Convertible版本。車價相對更抵玩外，換裝電動軟篷頂後嘅 120i， 22秒便以新面貌登場，黑身啡櫳靚絕配搭，當然可以全天候 Showoff。

■閂篷時為一架雙門 2+2 Coupe小跑。

135i有「縮水 M3」美譽，開篷版更係賣到斷貨。無他嘅， 1系玩靈活細車格局，車價門檻又唔算高，就算打工仔都唔算重負擔。今次輪到120i玩開篷，唔跟大佬 5系咁用高級硬摺篷設計，依然採用電動軟篷，好處除咗襟用、平價同更慳油外，對車身體積較小嘅1系嚟講，收納空間要求亦無咁大。開篷時間約 22秒，時間屬中規中矩，勝在電軟篷收合過程簡單順暢，最重要係行緊車都可開閂（車速40km/h以下），就算遇着過雲雨，都可隨時閂篷，避免變落湯雞。引伸落去，若停燈位見到靚女等過馬路，㩒吓個掣咪可以喺佢面前玩「變形金剛」囉，包佢一定留意你。就算你已經有美相伴，當遇到貨 Van佬眼甘甘望你隔籬位靚女時，亦大可「閉篷收花」，最多咪畀佢睥 22秒啫。

■ 22秒變靚啲，開篷後滿載瀟灑感。

內櫳皮料質感佳
上次試過 135i，已經好欣賞 50:50嘅前後車重分佈，能更穩定同易於操控。嚟到 120i，呢個優點仍然保留，尤其對屬尾轆車嘅120i嚟講，呢點更為重要。配備 2.0L直四引擎，話就話性能上不及「縮水 M3」咁堅，不過都有成 156匹馬力，推架2+2細車已相當具爆炸力啦，開埋篷迎風疾走，嗰種快感同刺激度又係一般硬頂車畀唔到你嘅。內櫳仍偏向豪華格局，全黑車身同車廂，配上啡色皮椅及門內側Two Tone襯色，坐同摸都 Feel到真皮嘅高級質感，真係唔開篷 Show off都對唔住你同架車。

■真皮軚盤一貫高級質感，軚感頗重，女仔泊車好易攰。

■雙圓大錶板跟硬頂版一樣，勝在易睇易明。

■咪睇小 2.0L直四偈，玩埋+/-波一樣飆得好刺激。

■最抵讚係開篷與否，尾箱仍有可觀空間，叻過好多硬摺篷車款。

規格
引擎： 1,995cc直四
馬力： 156ps/6,400rpm
扭力： 20.4kgm/3,600rpm
傳動：六速 Steptronic+/-波箱
售價：$409,000

歡迎光臨公仔箱論壇 (http://www3.tvboxnow.com/)