卡帥冷落泰利重用謝四

puma8811

卡比路實行「鐵碗統治」！英格蘭國家隊點兵，新領隊卡比路唔止飛起碧咸，甚至電話都唔打個畀泰利，完全唔理兩代隊長影響力，報道仲話，佢已經諗定搵謝拉特做住隊長先，即使日後泰利傷愈，都未必能夠得番個國家隊隊長臂章。

碧咸落選，英格蘭號召力難免大減，原本波衫贊助商Umbro希望，國家隊能夠安排車路士隊長泰利，出席周一新波衫發布會做生招牌，不過卡比路唔鍾意有人帶傷入隊，堅拒作出徵召，甚至電話都唔打畀泰利，擺晒官威。英國傳媒仲收到風，泰利唔係卡比路必然隊長人選。

據知英格蘭對瑞士熱身賽，利物浦隊長謝拉特會戴上隊長臂章，紅軍傳奇射手魯殊亦覺得，卡比路應該安排謝拉特長期擔正：「對我講，謝拉特係天生隊長，泰利都係一個好選擇，但我認為謝拉特會做得更好。」卡比路出名現實，由此可見任何球員幫唔到佢，都有可能被飛起！