Audi S4換心　時乖巧　時放肆

一直鍾情 Audi的旅行車款，既有個性，寬敞的尾廂又夠實用。不過人總係多心，旅行車總算有點型格，但型得起之餘，又會想跑得吓，S4就完全中晒要求！你要扮乖仔揸車代步，絕對無問題，不過有時想放肆一下，踩深油門的一剎，便是你感受這股澎湃感覺的開始。

細引擎升威力
熟悉 Audi車款的車迷，對 S4絕不陌生， S4至今已屬第五代。要講今次賣點，高性能引擎一定唔少得， S4配備首次用於新 A6的 3公升V6引擎，馬力 333匹，較上一代的 4.2公升 V8引擎少15匹馬力，但低轉扭力卻提升。不過別以為此改動會造成很大影響，試想想，上一代還是用 4.2公升引擎，現時已降至 3公升，加上V8引擎當時令車頭及全車整體重量大增，相反 V6體積較細，更令引擎擺位大幅退後 154mm，回到前軸之上，提高了車輛重量分佈的平衡性，今代S4車重減輕了 20kg，此舉絕對有助提速，由起步至 100公里，只需 5.1秒，較上一代還快 0.5秒，而最高時速，同樣鎖定在250公里。較突破的是， Audi今次喺 S4身上，棄 Turbo而選用Supercharger，此舉除了縮減引擎體積外，亦令耗油量減低。根據廠方數字，行走 100公里所需燃油為 9.9L，而房車版還少0.2L，以 300匹的跑車引擎來說，屬非常慳油。至於波箱， S4就用到 7速 S Tronic，當然還少不了 Audi引以為傲之quattro全時四驅系統。

■內櫳撞色設計，紅撞黑的座椅帶來一點野性味道。

■儀錶板設計簡約清晰。

■電鍍裝置加 S4標誌，靚仔醒目。

驚喜撞色

■內櫳各處有碳纖裝飾點綴，屬「跑車指定」。

除了內涵，外觀都唔可以忽視。驟眼看，S4整體外形與上一代相去不遠，但細看下，不難發現其細緻之處，車身用上大量電鍍裝飾，令線條更突出。而內櫳亦令人驚喜，大玩撞色，紅撞黑的效果，令人耳目一新，加上車內多個位置都換成碳纖部件，置身其中，感受到的是濃濃跑味。既然定位為高性能旅行車，速度感自然唔可以少，坐上駕駛席的一刻，手握操控性強的三幅式軚環，加上轉檔撥片輔助，便完全投入賽車手的感覺。踏下油門，隆隆引擎聲隨之響起，輕踏油門，還覺得表現稍為斯文，但若果你還未掌握其威力而胡亂深踏油門，你絕對會後悔，因為澎湃的速度感隨之而至，加速反應利落，絕對體驗出機械增壓的力量。至於轉檔反應亦十分敏銳，只是由高波換檔至低波時出現輕微的窒動，但只要你清楚這是一輛高性能的跑車，就絕對可以接受這種反應，否則你寧願揀選一部豪華房車算了。