十捷偉業】神奇老馬爆鑊甘！馬主：佢好有性格

02754566

九歲馬上周三有阿叻陳百祥愛駒「莫己若」爆30倍Win，這晚再有李易達馬房的九歲神奇老馬「享耆成」，於第五場三班1200米法國五月盃，爆冷打開今季勝門，單Win及組合獨贏A3，分別派240.5及27元。
「享耆成」堪稱性格巨星，有時可以輸得好肉酸大包尾，但畀心機跑時可以好厲害，連同今仗競賽生涯累積十捷之多，其中九場都係贏谷草短途1000或1200米。
講開法國五月盃，近兩屆都同24呢組數字有關，上屆盟主「有心人」大熱贏馬派24元，這晚頭馬「享耆成」則係24倍冷門。
「享耆成」練馬師李易達繼上周六「機緣再現」後，連續第二次賽事有馬贏，馬房累積18Win，其中七場由楊明綸勝出，係李廐最大功臣。
今場「華美之寶」由蔣嘉琦跑第二，而三、四名順序「快樂生活」、「中華寶貝」，四重彩派12萬幾。
「享耆成」馬主鄭錦鐘笑言，愛駒在亮相圈行第一個圈時，叫佢都唔睬，行第二個圈時才望向他，認真有性格。鄭錦鐘話沒有想過這位老人家今仗可以取勝累積10Win，每季都能交出頭馬，非常難得。他表示賽前和李易達商量過，此駒跑完今季後會退役，但如今能勝出，會否退役仍是未知之數。李易達指「享耆成」前領和後追都可以，跑法具彈性，至於何時退役，達哥說要看其健康和狀態而定。