曾掛靴轉行打欖球！肥佬騎師寶遜 要收服五班大懶馬

02754566

今期(1日)日馬有兩場一級賽大把話題，搞到開始客串不久嘅35歲好手寶遜冇乜人留意，剛周三更只有一匹馬跑，乃「永神駒」落第了；到今次座騎數目升回上四匹。當事人堂堂新西蘭冠軍騎師，騎功有番咁上下，而且佢夠豁達，話萬事最緊要冷靜，相信頭馬好快會見面。
寶遜最低只可以造122磅，唔易搵到座騎，話說喺2003年，當時只得23歲嘅佢，因為體重失控而掛靴，之後身型進一步暴漲，身高僅1米56居然肥到有175磅。
寶遜話自己轉行後，份份工都唔適合，包括做過短暫的欖球員，最終下定決心重操故業，展開地獄性減磅，勤力做gym同焗桑拿，飲食多菜少肉少油，最重要喺學識珍惜騎師呢份工，終於捱出有今日嘅成就。
正所謂要贏人先要贏自己，寶遜話做好晒賽前功課，今戰第二場五班2200米隻「樂在其中」，佢話睇晒呢匹馬上季所贏兩場頭馬，以及今季出賽嘅片段，早就知道佢性格懶到出汁，今次一出閘會大力推騎跟前，希望快啲省起匹馬，咁有誠意，寶遜隨時如願贏得香港第一Win。