馬迷一廂情願！雷神講明未贏得 劉皇發新兵熱瓜收場

02754566

這晚谷草第六場三班1000米，上演賽馬天下四十週年紀念盃。賽馬天下係本地最耐歷史的定期出辦賽馬刊物之一。
結果今場由騎練田泰安與姚本輝，攜手以「天心星」爆冷捧盃，此駒11檔起步火速埋欄，沿途前置下勝出，單Win及組合獨贏A3，分別派131.5及32.5元，田泰安複製第二場為苗廐「珍珠有利」建功的跑法，個人這晚刑滿復出起孖兼捧盃補數，今季頭馬突破40場，現以41Win排騎師榜第四位。
「心星」系由上周三開始連環出擊，當晚有方廐「澤心星」得第二，上周六則有同廐「傾心星」跑第九，卒之這晚由姚廐「天心星」出擊得手。姚本輝指「天心星」腳部健康不太穩定，操練時需要配上特別的鞋子，時操時停，花了許多工夫打理。姚本輝又指此馬蹄甲生得麻麻，谷草和泥地場地較鬆軟，更合發揮。
呢場二、三名順序係有飛馬「勝利寶石」及「海之濤」，第四名則由初跑谷草1000米的76倍大冷門「提款機」拎到，四重彩派18萬幾。三T有人中正獎，每注派328萬幾。呢場劉皇發愛駒「龍船」在港初出配雷神，賽前一日雷神接受訪問，已講明「龍船」走勢仍生硬未成熟，但臨場仍捧至2.8倍大熱，結果冇前冇後尾三而回即跑第十，馬迷喊得一句句。