我諗對車略有認識的人，講起豐田的皇冠（ Crown），總會聯想起─的士。算我膚淺，我亦有此想法，直至這部頂級兼限量版 Crown Athlete+M擺喺眼前，突然知道車都可以返老還童，老派感覺一洗而空，換來的，是充滿青春氣息兼霸氣，原來皇帝都可以轉形象。
老的變霸氣 o靚仔
千祈咪以為老實穩重的 Crown只係做「老的」，話晒係「皇族」，又點會咁低層次，呢架 Crown Athlete+M更加唔係普通貨色，而係 Crown家族裏面個頂級版，而且仲係限量生產，喺香港真係搵多架都難，簡直就係太上皇。單睇外形，過往老氣橫秋的印象一掃而空，取而代之是充滿霸氣的格調，與霧燈一體式設計的頭唇，充滿房跑味，加上微微上翹的尾翼，凸出其雄渾的車身，設計偏近方形的雙出式排氣喉，望落都知惹佢唔起。而尾燈燈組都經過精心改良，渾圓的煞車尾燈以電鍍包圍，搶眼到暈。外形無論點跑點惡，點都要保住豪氣，車櫳以真皮及仿碳纖做主打裝飾，又有導航系統、全方位式鏡頭等，邊架車挨近你，都睇得一清二楚。不過坐得 Crown，舒適享受總係要排頭位，座椅用上高級皮料，柔軟度啱啱好，前座還配備冷暖座椅按鈕，冬暖夏凉，貼心到不得了，後座還兼備座椅高低調控，老闆坐喺後面，一樣享受到。
■單看車頭，還以為是歐洲房跑。
■ LED煞車燈超級搶眼。
三環式 TFT錶板
■雙出式排氣喉成為車尾焦點。
講明頂級限量版，當然唔會喺車形上整色整水就過骨，+M版絕對係 Crown高性能代表，在 Crown車系中唯一採用 Supercharger，加上 3.5公升 V6引擎，有 360匹馬力，拍得住歐洲房跑性能。由於車身較上一代明顯修長，置身其中，絕對沒有累贅的感覺，而且望見電子式 TFT錶板換上三環式設計，帶來跑味之餘，行車數據及耗油量等資料亦一目了然。為兼顧乘坐房車的舒適以及跑車速度感，行車時可選擇 ECO及 SPORT模式，可以因應不同環境選擇操作模式，行車狀況任你選擇。
■尾座手枕位設多功能按鈕，乘客都可以話事。
■ Keyless功能， 㩒個掣就着引擎。
■車頂的鯊魚鰭，令車形添上惡相。
■車尾擾流器增加「火氣」。
■ Crown Athlete+M版是同系中唯一採用 Supercharger。
■全方位鏡頭，車邊有乜障礙物一目了然。
Crown Athlete+M規格
引擎： 3,456cc V6
馬力： 360ps/6,400rpm
扭力： 498Nm/3,200rpm
傳動： 6速自動波
售價：$998,000
|
發表於 2010-6-30 06:45 AM
| 