80後超跑不死　 NSX易養難揸

讀書時乜車都唔識，見到架兩個位扁撻撻嘅跑車，仲以為係拉利，到偶像馬榮成搵到錢都買咗架，先知佢個名叫NSX，屬日本國寶級超跑。中置偈尾轆車，預咗難操控，對住呢堆成廿歲嘅 NSX，忠心 Fans邦哥居然話維修同保養同普通 Honda車一樣咁Easy。

捧住現金都要買
凌志超跑 LF-A全球矚目，其實早在八十年代， Honda最強超跑 NSX，已經雄心萬丈要挑拉利機，將 F1車隊數據，瘋狂擺落NSX度，包括引擎、波箱同懸掛等技術。 NSX的確好靚好勁，不過開發同成本太重，導致近百萬身價太高門檻，當年唔係太多人捨得花咁多錢買日本車，到06年已經係最後一款。香港啱啱出現首間專營 NSX買賣同維修嘅公司，老闆邦哥就話幾貴都值得：「成班老友細細個已將 NSX當成 DreamCar，唔只個款未 Out，淨係副偈同賽車技術，到今日睇仍然好勁，而且仲會升值！」又唔係真正古董車，點升呀？「因為之前911事件引起經濟問題，令到好多車主放番啲靚車出嚟，二手 NSX交易多到不得了，最平見過 8萬蚊有交易。到今日當然升番晒，有個朋友就要用29萬買架 91年 NSX，咁高車齡好難上車會，就算捧住現金佢都要買！你咪以為超跑就事必難整難養，由於NSX唔會太多電子科技嘢，而且當年突破性採用唔生銹嘅鋁合金車架，所以維修同保養都好簡單，基本上同打理架 Civic、雅廓等普通Honda車一樣咁輕鬆，加上香港唔超過 40架，所以二手價先咁高。」

1.手上雖有十幾架極罕 NSX，但邦哥最愛係呢架。（非賣品，市價未連稅約 80萬）

2.少有的 T頂開篷（ Tiger頂），成塊車頂可完美收納車內。

3.配上 17" ZR17薄胎，唔算太誇張。

4.仿桶椅坐得較舒服，仲有電控調校功能，好 In。

心情好易駕馭

■唔講唔知，銀色 NSX才有紅底銀字廠徽。

邦哥由 Honda忠心 Fans，到今日專門買賣 NSX，對手上愛車真係當仔咁看待：「好多人話 MR車（中置引擎、尾輪驅動）難揸，我認為揸NSX好講心情，當你、發呆時，的確好難駕馭到佢，藉揸快車嚟發洩，更係危險到極嘅事。想發揮NSX真正優點，必須心平氣和、頭腦清晰咁去揸。」最後邦哥不忘同我上一堂 NSX歷史課：「 NSX係首架賣過百萬港紙嘅日本車，由 89年到06年只出過三代，包括 NA1（揭燈、 3,000cc）、 NA2前期（揭燈、 3,200cc）到 NA2後期（明燈），中間仲有兩款Type-R版，原廠已經改得好勁。」以前日本法例規定，幾勁都好，極限只可去到280匹，到今日當然可靠解鎖電腦而大幅提升馬力，令到呢位超跑「前輩」能再度發火，難怪 04-06年 NSX仍然可叫價 100萬以上。

■ 06年最尾款，紅色焗漆編號為 NSX獨有，約 120萬。

■左軚 NSX，依照 02年 GT500規格改裝，極砌得。

新 NSX量產？

NSX停產，不過佢喺賽車場上仍然老當益壯，到今天日本最勁嘅 GT500， Honda仍然派佢參戰。可惜 NSX經歷金融危機第二劫， 08年Honda CEO福井威夫不情願都要宣佈，已終止開發新一代 NSX。話雖如此， 09年失驚無神有部首配 V10引擎嘅NSX落場鬥車，引嚟全球車迷喝采，更認為 5.5L V10版 NSX快將量產。不論係咪美麗嘅誤會，睇見「末來」NSX型成咁，我都希望佢出得成。