百萬挑戰盃倒數 神舟射向榜首

02754566

跑完沙田例牌就返谷草，戲碼平淡一早預咗，之不過響2月24日前嘅四次谷草，對某啲人嚟講好重要，嚴重啲講都可算係兵家必爭之地！
點解？事關跑馬地百萬挑戰盃，由今期開始倒數只剩番四次機會爭分，咁對於響排行榜上有分揸手嘅馬係咪好重要先！家陣排頭位嘅係55分「金滙龍華」，之不過由於馬主方面有啲私事未處理好，暫時都唔會上陣住，所以其他馬正係反撲最佳時機，今回有三駒有分跑，分別係51分排緊第二位嘅「神舟小子」，40分排第五嘅「上浦猛將」，同埋31分排第七嘅「根深柢固」，表面睇當然係「神舟小子」最着數，之但係「上浦猛將」「根深柢固」並非冇得追，事關只要贏馬就進賬15分，跑二、三、四名就順序加6、4、3分，所以「上浦猛將」、「根深柢固」仲有得追，而呢三匹馬能夠順利上榜爭百萬狀元，多少靠雷神所賜，事關三駒最近贏馬都係佢經手，真係唔到你唔服！其他榜上有名嘅馬若想爭做狀元，搵到雷神幫手機會真係倍增。
呢個百萬挑戰盃，冠亞季軍都有獎金落袋，之但係騎、練就得個睇字，其實馬會相關部門可以諗諗提高刺激性，讓大家更加全情投入，點解唔加插谷草騎、練王？玩法可以好彈性，例如響指定嘅賽期裏，又或者跟百萬挑戰盃同期玩，對於馬迷嚟講絕對係好事，刨馬時起碼多個方向，而另一個好處係唔會俾幾個大倉壟斷，事關今季谷草成績最好嘅馬房，順序沈、呂、徐三個華人倉，假如設立呢個獎，係咪會鬥得更激烈，練馬師會鬥智鬥力，馬會嘅口號係同心、同步、同進，之但係處事手法明顯完全唔覺得扯上關係咯。