Lotus Elise SC　衞志豪辣手催花

曾經被指為護花使者守護李珊珊的衞志豪（ Michael），如今竟然一改常態辣手摧花？非也！實情係相約他試 Lotus Elise SC，方知Michael身手不凡，將其跑車潛能催谷至極限，所謂摧花，係「催」谷蓮「花」至真。 Elsie SC辣味十足，絕非淑女，要揮灑自如，Michael真係要有番咁上下技術喎！

輕身暴走

■ Michael認為，在 Elise SC身上享受到的，是跑車的獸性。

事前友人相告Michael爛瞓，記得 MorningCall。筆者醒目，早兩粒鐘叫醒佢！殊不知真人不露相，未瞓醒的他一上車猶如漫畫中的藤原拓海上身，從容不迫將蓮花舞得眉飛色舞。 218匹配上只重870kg輕身鋁合金車架， 0-100km/h只需要 4.6秒，一踩油已經如火箭般快，多得燈位不斷， Michael發揮不到 EliseSC極速 240km/h，令好吃力跟車尾的筆者得以看清其鮮紅LED尾燈。從尾望去，靚靚的鴨尾翼，的確如美女般搔首弄姿，野性得令所有男人神魂顛倒。此時大球場「學神」相助，筆者抽頭從倒後鏡觀看 EliseSC，極具跑味與挑釁性，一對有三眼小燈構成的車頭燈，果真有前有後。

■採用賽車式電子錶板。

■車底設有擾流板。

原始跑格

■內櫳簡潔，不過鋪排得滿有個性。

熄匙停車，1.8升直列四缸渦輪增壓引擎令Michael成個人醒晒！開番個車篷感受陽光空氣，走出猶如貼近水平線般的低座位：「原始、貼地、輕身，沒有自動波與風油軚，掟彎更有Mood！爆發力驚人，頭先大直路升上 8,000rpm，架車就『搶韁』，擺明車馬就係一架野性跑車！」無錯， Lotus過往堅持 DrivingPassion，不過 Elise SC已經 Tone過，油門反應雖直接但亦具線性。已擁有 GT-R與 Benz SLK的Michael，不諱言 Elise SC可考慮作第三部後備：「呢部純粹 Enjoy駕駛感，唔會載任何一人呀！」

開篷跑味爆棚，更多了份休閒感。

規格
引擎： 1,796c.c.直四 Supercharger
馬力： 218ps/8,000rpm
扭力： 21.6kgm/5,000rpm
傳動： 6速手動波箱
售價：$599,000起

後睇線條玲瓏夠誇張，明挑釁！

側睇小鴨尾翼好突出，幾型仔！

後記：「我唔會輸畀錢嘉樂！」
近水樓台，要收吓風 Michael班明星 Friend邊個手車最勁。究竟城城係咪真係咁辣呢？「亞黃梗係勁！最緊要係有鬥心，試過喺珠海鬥車Ball Out咗都力追，最後得第三，印象中佢係唔輸得的專業車手。」咁契爺校長又點呀？「佢好穩陣喎！揸架Jeep不知幾禮讓！」至於疑似前情敵錢嘉樂的技術，Michael話一定唔會輸畀錢嘉樂……好多。「同佢鬥輸五六個車位啦！哈哈！佢勝在夠經驗，係老手！」賽場輸咗唔緊要，情場贏過就得啦！係唔係？咁就真係要問吓珊珊啦！